माझा मृतदेह विशालच्या घरी ठेवा, तेव्हाच आत्म्याला शांती लाभेल; चिठ्ठी लिहून तरुणीची आत्महत्या

चिठ्ठी लिहिल्यानंतर गळफास घेऊन तरुणीची आत्महत्या; पोलीस ठाण्यात गुन्हा दाखल

सूरत: गुजरातच्या सूरतमध्ये एका तरुणीनं आत्महत्या केली आहे. कापोद्रामध्ये वास्तव्यास असलेल्या तरुणीनं सुसाईड नोट लिहून जीवनयात्रा संपवली आहे. ३० वर्षीय तरुणीचे विशाल पटेल नावाच्या तरुणाशी प्रेमसंबंध होते. विशाल पटेल विवाहित आहे. विशालनं तरुणीला लग्नाचं वचन दिलं होतं. 

शुक्रवारी तरुणीनं सकाळी तिच्या राहत्या घरी गळफास लावून आत्महत्या केली. तरुणीच्या वडिलांनी विशाल आणि त्याची पत्नी कोमलविरोधात कापोद्रा पोलीस ठाण्यात गुन्हा दाखल केला आहे. याआधी मंगळवारी तरुणीनं विशालविरोधात तक्रार दाखल केली होती.

आत्महत्येपूर्वी तरुणीनं एक चिठ्ठी लिहिली. चार वर्षांपासून माझे विशालसोबत प्रेमसंबंध होते. त्यानं मला लग्नाचं वचन दिलं होतं. विशालची पत्नी कोमलला आमच्या संबंधांची माहिती होती, असा उल्लेख चिठ्ठीत आहे. 'कोमलला आमच्या नात्याची कल्पना असूनही ती मला आणि विशालला साथ द्यायची. मी उचलत असलेल्या पावलामुळे माझ्या कुटुंबाला दु:ख होईल. पण मला आता त्रास, दु:ख सहन होत नाही. माझ्या मृत्यूनंतर माझा मृतदेह कुटुंबाकडे देण्यापूर्वी विशालच्या घरात ठेवण्यात यावा. त्यामुळे माझ्या आत्म्याला शांती लाभेल,' असं तरुणीनं चिठ्ठीत लिहिलं आहे.