Kolhapur Crime | "मी सांगायचं काम केलं, आता मृतदेह तुम्ही शोधून काढा..."; फोन आला नि पोलिसही चक्रावले!

पोलिसांनीही सांगितलेल्या ठिकाणी तपास केला, वाचा तिथे नेमकं काय घडलं...

सरदार चौगुले - पोर्ले तर्फ ठाणे (कोल्हापूर): "मी एका महिलेचा खून केला आहे. तिला तुम्हीच शोधून काढा. ते तुमचं काम आहे," असे एका माथेफिरूने पोलिसांना फोन करून सांगितले आणि त्यांना आव्हान देत चक्रावून सोडले. त्याच्या सांगण्यावरून पोलिसांची वाघबीळ घाटाचा डोंगर शोधला; परंतू मृतदेह कोठेही आढळून आला नाही. घटनास्थळी रक्ताने माखलेले अंथरूण, जागोजागी पडलेले रक्ताचे डाग आणि माथेफिरूचे हातात धारधार विळा घेऊन रस्त्यावरील वाहनधारकांच्या पाठिमागे लागणे खूनाचा केलेला बनाव. वाघबीळ घाटात माथेफिरूने घातलेल्या गोंधळामुळे पोलिसांसह सर्वांची झोप उडवून टाकली होती. या घटनेची करवीर पोलीस ठाण्यात नोंद केली आहे.

अधिक माहिती अशी, कोल्हापूर-रत्नागिरी रोडवरील वाघबीळ घाटातील चिले मंदिराजवळ शनिवारी (२८ जाने.) सकाळी बाराच्या सुमारास प्रविण विष्णू कांबळे (वय ३०, रा. चिखली, ता. शिराळा, जि.सांगली) हा माथेफिरू तरूण हातात विळा घेऊन, 'मी एका महिलेचा खून केला आहे. तिला घाटात बघायला जा' असे वाहनांच्या मागे लागून सांगत होता. हे वृत्त अज्ञातांनी पन्हाळा पोलिसांना सांगितले. त्यानंतर पन्हाळा, कोडोली आणि करवीर पोलिसांनी तातडीने घटनास्थळी येऊन त्या माथेफिरूला ताब्यात घेतले.

लोकांची गर्दी बघून बेशुध्द असल्याचा बनाव केलेला प्रविण पोलिसांना बघून शुध्दीवर आला. त्याच्याकडे चौकशी केली, तर मी माझ्या बहिणींचा खून केला. तुम्ही तिला शोधा, ते तुमचे काम आहे, असे तो म्हणाला. त्याच्या सांगण्यावरून बाजूला चौकशी केली तर रात्र घालविलेल्या जागेवर अंथरूण रक्ताने माखले होते आणि त्यावरती बोटाने लिहिले असल्याने खूनाचा संशय वाढला.

त्यानंतर कोडोलीचे पोलिस निरीक्षक डोईजड, पोलिस पाटील सचिन भोपळे, पंडीत नलवडे यांनी वाघबीळ घाट पिंजून काढला; परंतु मृतदेह सापडला नाही. प्रविणने डाव्या हाताची नस कापली असल्याचे दिसले. तेच रक्त अंथरूण आणि विळ्याला लागले असल्याचे पाहून प्रविणने खूनाचा बनाव केला असल्याचे निष्पन्न झाले. त्याला रूग्णवाहिकेतून उपचारासाठी पाठवले गेले. प्रविणचा भाऊ प्रशांत यानी आईच्या निधनानंतर प्रविण मानसिक दडपणाखाली असून तो निनाई चिखली साखर कारखान्यात काम करतो, असे सांगितले.