Gangster Raju Theth: १० वर्षांपासून प्लॅनिंग! लॉरेन्स गँगने ‘असा’ रचला राजू थेठच्या हत्येचा कट; लेडी डॉनचाही समावेश?

राजू थेठ लॉरेन्स बिश्नोई गँगच्या निशाण्यावर होता, असे सांगितले जात आहे.

Gangster Raju Theth:राजस्थानमधील सीकरमध्ये पुन्हा एकदा गँगवॉरची घटना समोर आली. प्रसिद्ध पंजाबी गायक सिद्धू मुसेवाला याच्या हत्येची जबाबदारी घेतलेल्या बिश्नोई गँगनेच राजस्थानी गँगस्टर राजू थेठ याची गोळ्या झाडून हत्या करण्यात आल्याचे सांगण्यात येत आहे. लॉरेन्स बिश्नोई गँगने हत्येच्या नंतर दोन तासांतच या घटनेची जबाबदारी घेतली. एका फेसबुक पोस्टमध्ये, बिश्नोई गँगचा रोहित गोदारा याने हत्येची जबाबदारी घेतली. बलवीर आणि आनंदपाल यांच्या हत्येचा हा बदला घेतला गेला, असेही त्याने सांगितले.

गँगस्टर राजू थेठ त्याच्या घरी पीजी हॉस्टेल चालवत असे. या हल्ल्यात राजू थेठसह पीजीमध्ये राहणाऱ्या विद्यार्थ्याच्या वडिलांचा या गोळीबारात मृत्यू झाल्याचे सांगितले जात आहे. हल्ल्याच्या वेळी एक व्यक्ती व्हिडिओ बनवत होता. त्याच्या पायालाही गोळी लागली आहे. राजू थेठ यांच्यावर झालेल्या गोळीबाराच्या घटनेत अन्य एकूण तीन जणांना गोळ्या लागल्या होत्या. 

गेल्या १० वर्षांपासून राजू थेठवर होती नजर

दिल्ली पोलिसांच्या विशेष पथकाच्या माहितीनुसार, सुमारे १० वर्षांपासून राजू थेठच्या हत्येची योजना आखली जात होती. या प्लॅनमध्ये लॉरेन्स बिश्नोईसह आनंदपाल टोळी आणि काला जाठेदी टोळीतील शूटर्सचा यामध्ये समावेश होता. यामुळे राजू थेठ हा बऱ्याच दिवसांपासून या टोळीच्या निशाण्यावर असल्याचे स्पष्ट झाले असल्याचे सांगितले जात आहे. पोलिसांनी सीसीटीव्ही फुटेज बारकाईने स्कॅन केले. त्यात ४ जण दिसत आहेत. यामध्ये एक जण त्याच्याशी बोलताना दिसत आहे. तत्पूर्वी, या हत्येची जबाबदारी रोहित गोदरा या फेसबुक आयडीवरून घेण्यात आली आहे. आनंदपाल आणि बलबीर बानुदा यांच्या हत्येचा बदला घेतल्याचे नमूद करण्यात आले आहे. रोहित गोदाराने लिहिले आहे की, मी हत्येची जबाबदारी घेतो, बदला पूर्ण झाला आहे.

दरम्यान, आनंदपाल पोलीस चकमकीत मारला गेला. आनंदपालच्या मृत्यूनंतर त्याची गर्लफ्रेंड लेडी डॉन अनुराधा हिने लॉरेन्स बिश्नोई आणि कला जठेडी यांच्याशी हातमिळवणी केली. लॉरेन्स आणि काला जठेडी टोळीने मिळून राजू थेठची हत्या केल्याचे सांगितले जाते. या घटनेचा व्हिडिओही समोर आला आहे. व्हिडिओत दिसत असल्याप्रमाणे हल्लेखोर बिनदिक्कत गोळीबार करत असल्याचे स्पष्ट होत आहे. व्हिडिओमध्ये चार आरोपी दिसत आहेत. चौघांच्याही हातात शस्त्रे आहेत. आरोपींनी राजू थेठ याच्यावर गोळीबार सुरू करताच तेथे चेंगराचेंगरी झाली. गोळ्यांचा आवाज ऐकून लोक धावू लागतात. त्याचवेळी गोळीबार करून आरोपी अगदी आरामात पुढे निघून जातात. यादरम्यान एका आरोपीने हवेत गोळीबार केल्याचेही दिसते.

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"