लहान मुलगा अंगावर थुंकला, ​त्याच्या आईला चौघांनी केली मारहाण

Crime News : तुमचा मुलगा राज ह्याने आपल्या अंगावर थुंकल्याची तक्रार विवेक याने गुडियादेवी यांच्याकडे केली. त्यावर राज याला बोलावून पकडून मारते असे तिने विवेकला सांगितले.

मीरारोड - लहान मुलगा अंगावर थुंकला म्हणून त्याच्या आईला चार महिलांनी मिळून बेदम मारहाण केल्या प्रकरणी भाईंदर पोलीस ठाण्यात बुधवारी गुन्हा दाखल झाला आहे.

गुप्ता गल्लीत गुडीयादेवी सैनी (२३) ह्या पती मुकेश व दोन मुलांसह राहतात. मंगळवारी सायंकाळी त्याच गल्लीत राहणाऱ्या छाया गुप्ता हिचा नातू विवेक हा सैनी यांच्या घरी गेला. तुमचा मुलगा राज ह्याने आपल्या अंगावर थुंकल्याची तक्रार विवेक याने गुडियादेवी यांच्याकडे केली. त्यावर राज याला बोलावून पकडून मारते असे तिने विवेकला सांगितले.

काहीवेळातच छाया सह बन्ना, मीना व मोटीबाई ह्या चौघी जणी गुडियादेवीच्या घरा बाहेर आल्या आणि त्यांना शिव्या देऊन लागल्या. शिवीगाळ का करता ? अशी विचारणा केली असता विवेकची आई बन्ना हिने, तुझा मुलगा राज हा माझ्या मुलाच्या अंगावर थुंकला असे सांगून पुन्हा त्या चौघीनी शिवीगाळ करायला सुरवात केली. गुडियादेवी समजूत काढू लागली असता त्या चौघीनी तिला खेचून ठोशाबुक्क्यांनी व लाथांनी मारहाण सुरु केली. बन्ना हिने गुडियादेवीचा कान धरून खेचला असता कानातील रिंग ओढली गेल्याने कानाची पाळी फाटून रक्त वाहू लागले.

गुडियादेवी हिने स्वतःची सुटका करून घेत भाईंदर पोलीस ठाणे गाठले. पोलिसांनी उपचारासाठी चिठ्ठी दिल्यावर आधी भाईंदरच्या भीमसेन जोशी रुग्णालयात गेल्या. तेथून त्यांना कांदिवलीच्या शताब्दी रुग्णालयात पाठवण्यात आले . उपचारानंतर ५ जानेवारी बुधवार रोजी पोलिसांनी छाया, बन्ना, मीना व मोटीबाई ह्या चौघींवर गुन्हा दाखल केला आहे.