प्रियकराने केली प्रेयसीच्या मुलाची हत्या

Crime News : प्रियकराने प्रेयसीच्या आठ वर्षीय मुलाची निर्घृण हत्या केल्याची घटना शनिवारी रात्रीच्या सुमारास उघडकीस आली.

तेल्हारा: स्थानिक पोलीस स्टेशनच्या हद्दीत येत असलेल्या वाडी अदमपूर येथे प्रियकराने प्रेयसीच्या आठ वर्षीय मुलाची निर्घृण हत्या केल्याची घटना शनिवारी रात्रीच्या सुमारास उघडकीस आली. या प्रकरणात मुलाच्या आईने दिलेल्या फिर्यादीवरून आरोपीस अटक केली आहे.

पोलीस सूत्रांनी दिलेल्या माहितीनुसार, आरोपी संजय श्यामराव नवलकर (३२) यास दोन अपत्ये असून, तो पत्नीविना राहत होता. तर फिर्यादी सोनाली राजू कुमरे (३०) हिला दोन अपत्ये असून, ती पतीविना राहत होती. आरोपी संजय व फिर्यादी सोनाली हे दोघेही एका कारखान्यात काम करीत असताना दोघांचे सूत जुळले होते. त्यामुळे आरोपी संजय व फिर्यादी सोनाली हे दोघेही वाडी अदमपूर येथे सोबत राहत होते. फिर्यादी सोनालीला मुलगा वेदांत व एक मुलगी श्रावणी असे दोन अपत्ये आहेत. मृतक वेदांत (८) याने पिण्याच्या पाण्याच्या माठात ग्लास बुडविल्याच्या कारणावरून आरोपी संजय नवलकर याने लाकडाच्या साहाय्याने मारहाण करू लागला. हे पाहून त्याला वाचविण्यासाठी त्याची बहीण श्रावणी गेली असता, तिला देखील काठीने मारून जखमी केले. त्यानंतर आरोपी संजय नवलकर याने वेदांच्या छातीवर दगड ठेवून त्याची हत्या केली. तसेच फिर्यादी सोनाली राजू कुमरे हिला जीवे मारण्याची धमकी दिली. फिर्यादी सोनाली कुमरे हिने तेल्हारा पोलिसात दिलेल्या फिर्यादीनुसार, पोलिसांनी आरोपी संजय नवलकर यास अटक करून कलम ३०२, ३२४, ५०४ सहकलम ३(२) नुसार गुन्हा दाखल केला.