वर्धा: अल्पवयीन मुलीचा अश्लील व्हिडीओ तिच्या वाढदिवशी केला ‘व्हायरल’

आर्वीच्या युवकाविरुद्ध गुन्हा दाखल, गाडगेनगर पोलिसांतून गुन्हा वर्ग

वर्धा: अल्पवयीन मुलीला आर्वी शहरातील संस्कृती गार्डनमध्ये बोलावून तिचा अश्लील व्हिडीओ मोबाईलमध्ये चित्रित करुन तिच्या वाढदिवशी सोशल मीडियावर व्हायरल करुन मुलीची बदनामी करुन विनयभंग केल्याची घटना घडली. या प्रकरणाची तक्रार अमरावती येथील गाडगेनगर पोलिसात दाखल केली. मात्र, घटनास्थळ आर्वी शहरातील असल्याने हे प्रकरण आर्वी पोलिसांकडे वर्ग करण्यात आले असून आरोपीविरुद्ध गुन्हा दाखल केला असून त्याचा शोध सुरु असल्याची माहिती पोलीस निरीक्षक भानुदास पिदूरकर यांनी दिली.

अमरावती येथील अल्पवयीन मुलगी आर्वीत शिक्षणासाठी असताना सप्टेंबर २०२० मध्ये तिची ओळख गौरव नामक युवकासोबत झाली. त्याने तिच्याशी जवळीक निर्माण करुन तिला आर्वी येथील संस्कृती गार्डनमध्ये बोलावून स्वत:च्या मोबाईलमध्ये अश्लिल व्हिडीओ काढले. मुलीने त्यास हटकले असता आरोपी गौरवने तिला गप्प बसविले. १ सप्टेंबर २०२२ रोजी मुलीचा वाढदिवस असल्याने ती तिच्या कुटुंबियासोबत अमरावती येथील घरी असताना तिच्या चुलत भावाने मुलीच्या वडिलांच्या मोबाईलवर वर्षभरापूर्वी गौरवने काढलेला अश्लिल व्हिडीओ पोस्ट केला. तो व्हिडीओ आरोपी गौरव याने स्वत:च्या स्टेटसवर ठेवला होता. यामुळे मुलीची बदनामी झाली. अखेर मुलीने थेट अमरावती येथील गाडगेनगर पोलीस ठाणे गाठून या बाबतची तक्रार दिली.

पोलिसांनी आरोपी गौरवविरुद्ध गुन्हा दाखल करुन सदर प्रकरण पोलीस अधिक्षक कार्यालयामार्फत आर्वी पोलिसांकडे वर्ग केले. आर्वी पोलिसांनी या प्रकरणात आरोपी गौरवविरुद्ध गुन्हा दाखल केला असून लवकरच त्याला अटक करण्यात येईल, अशी माहिती पिदूरकर यांनी दिली.