कोल्ड्रिंकमध्ये गुंगीचं औषध मिसळून पॉर्न व्हिडीओ तयार केला; मिस इंडिया युनिव्हर्सच्या आरोपानं खळबळ

राज कुंद्रा प्रकरण ताजं असताना नव्या आरोपामुळे खळबळ

मुंबई: अभिनेत्री शिल्पा शेट्टीचा पती राज कुंद्रा अश्लिल व्हिडीओ प्रकरणामुळे अडचणीत सापडला असताना आता अशाच प्रकारचं आणखी एक प्रकरण समोर आलं आहे. झारखंडच्या धनबादमध्ये वास्तव्यास असलेल्या मिस इंडिया युनिव्हर्स परी पासवाननं मुंबईतल्या एका प्रोडक्शन कंपनीवर गंभीर आरोप केले आहेत. प्रोडक्शन कंपनीनं आपल्यासोबत दुष्कृत्य केल्याचा आरोप परी पासवाननं केला. मात्र ती कंपनी कोणाची आहे याबद्दलची माहिती परीला नाही.

मिस इंडिया युनिव्हर्स असलेली परी मॉडेलिंग करते. त्यामुळे ती काम शोधण्यासाठी मुंबईला आली होती. त्याचवेळी तिच्यासोबत भयंकर घटना घडल्याचं तिनं सांगितलं. 'मी काम शोधण्यासाठी मुंबईला गेले होते. एका ठिकाणी कोल्ड्रिंकमध्ये गुंगीचं औषध मिसळून माझा अश्लिल व्हिडीओ तयार करण्यात आला. जेव्हा मला याची माहिती मिळाली, तेव्हा मी मुंबई पोलिसांकडे तक्रार दाखल केली. पोलीस घटनेचा तपास करत आहेत,' असं परीनं सांगितलं.

काही दिवसांपूर्वीच परीनं तिचा पती नीरज पासवानविरोधात पोलिसात तक्रार दाखल केली. हुंड्यासाठी छळ करण्यात येत असल्याचा आरोप तिनं दीर चंदन आणि सासू आशा देवीविरोधात केला होता. परीनं तक्रार दाखल केल्यानंतर नीरजला धनबाद पोलिसांनी अटक केली. नीरजच्या कुटुंबीयांनीदेखील परीवर आरोप केले आहेत. नीरजच्या आधी परीनं आणखी दोन तरुणांची आयुष्य उद्ध्वस्त केली आहेत. तिनं २ तरुणांशी विवाह केले असून, त्यांच्या विरोधातही गुन्हे दाखल केले असल्याचा दावा नीरजचा भाऊ चंदननं केला. 

झारखंडच्या गुमलामध्ये वास्तव्यास असलेल्या मॉडेल परीनं २०१९ मध्ये मिस इंडिया युनिव्हर्स खिताब जिंकला. कतराजमध्ये राहणाऱ्या नीरजसोबत तिचा विवाह झाला. पती आणि सासरची मंडळी हुंड्याची मागणी करून त्रास देत असल्याचा आरोप परीनं केला. त्यानंतर तिच्या पतीला पोलिसांनी बेड्या ठोकल्या.