उल्हासनगरातील १७ सेक्शन चौकात तलवारी घेऊन टोळक्यांचा धिंगाणा, तरुणावर हल्ला

Crime News : उल्हासनगर कॅम्प नं-३, १७ सेक्शन चौकातील चहा टपरीवर कमल कनोजिया यांचा चौघाडीतील एका तरुणाला ४ नोव्हेंबर रोजी रात्री धक्का लागला.

सदानंद नाईक

उल्हासनगर : शहरातील १७ सेक्शन चौकात चहाच्या टपरीवर धक्का लागल्याच्या कारणावरून चौघाडीने, एका तरुणावर हल्ला केला. टोळक्याने भर चौकात तलवारी नाचवीत धिंगाणा घातला असून मध्यवर्ती पोलीस ठाण्यात गुन्हा दाखल झाला. यापैकी दोघाला पोलिसांनी ताब्यात घेतल्याची माहिती वरिष्ठ पोलीस निरीक्षक मधुकर कड यांनी दिली आहे. 

उल्हासनगर कॅम्प नं-३, १७ सेक्शन चौकातील चहा टपरीवर कमल कनोजिया यांचा चौघाडीतील एका तरुणाला ४ नोव्हेंबर रोजी रात्री धक्का लागला. यातून त्यांच्यात वाद झाल्यावर संतप्त चार जणांच्या टोळक्याने तलवारी सारखे घातक शस्त्र नाचवीत कमल कनोजिया याच्यावर हल्ला केला. याप्रकारने चौक परिसरात भितीचे वातावरण निर्माण झाले असून गंभीर जखमी झालेल्या तरुणावर मध्यवर्ती रुग्णालयात उपचार सुरू आहे. याप्रकरणी मध्यवर्ती पोलीस ठाण्यात गुन्हा दाखल झाला. मारहाण प्रकरणी दोघांना ताब्यात घेतल्याची माहिती मध्यवर्ती पोलीस ठाण्याचे वरिष्ठ पोलीस निरीक्षक मधुकर कड यांनी दिली. ज्या तरुणावर हल्ला झाला. त्या तरुणाची पाश्वभूमी गुन्हेगारीवृत्तीची असल्याची माहिती त्यांनी दिली. याप्रकारने शहरातील गुन्हेगारीची चर्चा पुन्हा रंगली असून पोलिसांनी गुन्हेगारांवर आपला वचक बसविण्याची मागणी होत आहे.