पंढरपूर, सांगली, सोलापुरात दहशत माजविणाऱ्या पाच जणांच्या टोळीला 'मोक्का'

मारामारी, खून, खंडणी अशा गंभीर गुन्ह्यांचा समावेश

पंढरपूर:  पंढरपुर शहर व तालुका, सांगोला, मिरज, सांगली, सोलापुर शहर पोलीस ठाणे हददीमध्ये गंभीर गुन्हे करून समाजामध्ये अशांतता व दहशतीचे वातावरण निर्माण करून सर्वसामान्य जनतेचे जनजीवन विस्कळीत करून दहशत माजविणाऱ्या पाच जणांच्या एका टोळीवर पोलिसांनी महाराष्ट्र संघटित गुन्हेगारी अधिनियमाचे (मोक्का) विविध कलमान्वये कारवाई केली आहे. टोळीप्रमुख प्रतिक उर्फ बबलु हरिभाउ प्रक्षाळे (वय ३२, रा. भटुंबरे, ता. पंढरपूर) व टोळी सद्यस सोमनाथ दिगंबर खंकाळ (वय ३९, रा. गणेश नर्सरी जवळ, गजानन नगर, पंढरपूर), निखील कृष्णा राजुरकर, (वय ३२, रा. हणुमान नगर, टाकळी रोड, पंढरपूर), रविंद्र हरिभाउ गुरव (वय ४२, रा. रुक्मिणी विद्यापीठ शेजारी, रेल्वे स्टेशन जवळ, पंढरपूर), विक्रांत दशरथ माने (रा. पढरपूर जि. सोलापूर) यांनी मारामारी, खुन करणे, खुनाचा प्रयत्न करणे, खंडणी मागणी करणे, वाळु चोरी, अपहरण करणे, बेकायदेशीर हत्यार बाळगणे, चोरी, जबरी चोरी करणे, घरात घुसून मारहाण करणे, सरकारी नोकरावर हल्ले करणे यासारखे गंभीर गुन्हे केले आहेत. यामुळे त्यांच्या विरूध्द पोलीस अधिक्षक शिरीष सरदेशपांडे, अतिरिक्त पोलीस अधिक्षक हिंमत जाधव यांच्या मार्गदर्शनाखाली पोलीस निरीक्षक मिलींद पाटील यांनी  मोका प्रस्ताव तयार केला.

त्या प्रस्तावास कोल्हापुर परीक्षेत्राचे विशेष पोलीस महानिरीक्षक सुनील फुलारी यांच्याकडून महाराष्ट्र संघटित गुन्हेगारी अधिनियमाचे (मोका) कायदयाअंतर्गत विविध कलमान्वये कारवाई करण्याची मंजुरी मिळाले. उपविभागीय पोलीस अधिकारी डॉ. अर्जुन भोसले यांनी या गुन्हयाचा अधिक तपास करून यातील टोळीप्रमुख व टोळी सदस्य यांच्याविरूध्द अंतिम दोषारोपपत्र पाठविण्याची महाराष्ट्र राज्य मुंबई अतिरिक्त पोलीस महासंचालकांची यांची अंतिम मंजुरी घेतली. टोळीप्रमुख व टोळीसदस्य यांचेविरूध्द मोका न्यायालयामध्ये दोषारोपपत्र सादर केले आहे. ही कारवाई पोलीस अधिक्षक शिरीष सरदेशपांडे, अतिरिक्त पोलीस अधिक्षक हिंमत जाधव यांच्या मार्गदर्शनाखाली उपविभागीय पोलीस अधिकारी डॉ. अर्जुन भोसले, पोलीस निरीक्षक मिलींद  पाटील, पोसई हमीद शेख, पोहेकॉ शिवाजी पाटील, पोना सचिन तांबिले, पोकॉ राहुल लोंढे यांनी केलेली आहे.