१३ महिन्यांच्या चिमुकलीची हत्या करून आईचा आत्महत्येचा प्रयत्न!

Mother attempts suicide by killing 13-month-old girl : प्रियंका बोबडे हिने झोपलेल्या १३ वर्षीय मुलीचा अचानक गळा दाबून तिची निर्घृण हत्या केली.

ठळक मुद्देपतीच्या तक्रारीनुसार गुन्हा दाखलकौटुंबिक वादातून घटना घडल्याचा संशय

अकोला : पोटच्या १३ महिन्यांच्या चिमुकल्या मुलीची निर्घृण हत्या करून आईने हाताची नस कापून व गळफास घेऊन आत्महत्या करण्याचा प्रयत्न केल्याची घटना मंगळवारी सकाळी उघडकीस आली. या प्रकरणात पतीच्या तक्रारीनुसार एमआयडीसी पोलिसांनी महिलेविरुद्ध गुन्हा दाखल केला. काैटुंबिक वादातून ही घटना घडल्याचा पोलिसांना दाट संशय आहे.

येथून जवळच असलेल्या बाभुळगाव येथील प्रियंका उमेश बोबडे (२६) हिला १३ महिन्यांची अधिरा नावाची एक मुलगी होती. पती व कुटुंबासह ती बाभुळगाव येथे राहते. सोमवारी दुपारच्या सुमारास प्रियंका बोबडे हिने झोपलेल्या १३ वर्षीय मुलीचा अचानक गळा दाबून तिची निर्घृण हत्या केली. त्यानंतर तिने स्वत:च्या हाताची नस कापली. परंतु यामुळे प्राण जाणार नाही, असे लक्षात आल्यावर तिने ओढणीने गळफास घेऊन आत्महत्या करण्याचा प्रयत्न केला. हा प्रकार पती व कुटुंबीयांच्या लक्षात आल्यावर तिला तातडीने सर्वोपचार रुग्णालयात उपचारार्थ भरती करण्यात आले. तिची प्रकृती गंभीर असल्याचे समजते. प्रियंकाला रुग्णालयातील अतिदक्षता कक्षात भरती केले आहे. या प्रकरणात सोमवारी रात्री उशिरा एमआयडीसी पोलिसांनी पतीच्या तक्रारीनुसार प्रियंका बोबडे हिच्याविरुद्ध गुन्हा दाखल केला. दरम्यान, मुलीच्या हत्येमागील तसेच महिलेने आत्महत्येचा प्रयत्न करण्यामागील कारण समजू शकलेले नाही. पुढील तपास एमआयडीसी पोलीस ठाण्याचे पोलीस निरीक्षक किशोर वानखडे करीत आहेत.

महिलेने मुलीची हत्या का केली, यामागील कारण पुढे आले नाही. पतीची चौकशी केली असता त्याने, पत्नी माहेरी गेली होती. तेथून परत आल्यावर तिने हा प्रकार केला, असे सांगितले. काैटुंबिक वादातून हा प्रकार घडल्याची शक्यता आहे. महिला शुद्धीवर आल्यावरच घटनेमागील कारणांचा उलगडा होईल.

- जी. श्रीधर, पोलीस अधीक्षक