पुण्यात भरदिवसा 'मुळशी पॅटर्न'फेम थरार! रस्त्यावर पाठलाग करत दोघांवर धारदार शस्त्राने वार

एका तरुणाचा जागीच मृत्यू झाला तर दुसरा गंभीर जखमी

ठळक मुद्देयाप्रकरणी पोलिसांनी एकजण ताब्यात

पुणे (धनकवडी) : बिबवेवाडी येथील गंगाधाम रस्त्यावर पाठलाग करत दोघांवर धारदार शस्त्राने खुनी हल्ला करण्यात आला. यामध्ये एका तरुणाचा जागीच मृत्यू झाला तर दुसरा गंभीर जखमी झाला आहे. ही घटना शुक्रवारी अकराच्या सुमारास ऐन वर्दळीच्या वेळी घडली. याप्रकरणी बिबवेवाडी पोलीस तातडीने घटनास्थळी दाखल झाले. सलीम मेहबूब शेख, वय २४ वर्षे असे मृत व्यक्ती चे नाव आहे तर या हल्ल्यात तोहफिक शेख, वय २७ वर्षे जखमी झाले आहेत. 

याप्रकरणी पोलिसांनी एकास ताब्यात घेतले असून हा खून पुर्ववैमनस्यातून झाल्याचा प्राथमिक अंदाज व्यक्त करण्यात आला आहे. आरोपी व मृत यांच्यामध्ये पुर्वी पासून वाद होते. आज सकाळीही त्यांच्यात वाद झाला आणि या वादातून ही घटना घडली. मृत व आरोपी एकमेकांचे मित्र आहेत. अनेकदा ते मद्यपान करण्यास एकत्र बसत होते. यातूनच त्यांच्यात वाद होत होते. सलीम व तोहफिक मुख्य रस्त्यापासून आतल्या रस्त्याकडे जात असताना आरोपी अचानक त्यांच्यामागून आला. त्याने दोघांनाही काही समजायच्या आतच पालघनसारख्या हत्याराने त्यांच्यावर वार केले. हे वार वर्मी लागल्याने सलीमचा जागेवरच मृत्यू झाला तर तोहफिकला गंभीर जखमी अवस्थेत रुग्णालया त दाखल करण्यात आले आहे. घटनास्थळी वरिष्ठ पोलीस निरीक्षक सुनिल झावरे व पोलीस उपनिरीक्षक किरण लिटे दाखल झाले होते.