मम्मा, चल आपणही पप्पांसारखे तारा होऊ अन्..; लहानग्या मुलीसह महिलेची आत्महत्या

हृदय पिळवटून टाकणारी ही घटना शनिवारी येथील विनयनगर परिसरात घडली. सुजाता प्रवीण तेजाळे (३६) व अनया प्रवीण तेजाळे (७) असे या दुर्दैवी मायलेकीचे नाव आहे

ठळक मुद्देसुजाता यांचे पती प्रवीण तेजाळे यांचा पाच महिन्यांपूर्वी कोरोनाने मृत्यू झाला होता.‘अनयाला येणारी पप्पांची आठवण अन् मला पतीचा विरह सहन होत नव्हता. आईबापाशिवाय अर्थ नाही आणि नवऱ्याशिवायही अर्थ नाही...!’ अशा शब्दांत चिठ्ठी लिहीत त्यांनी चिमुकलीसोबत जीवनप्रवास संपविला.

नाशिक :  ‘पप्पांची सतत आठवण येते. पप्पा जिकडे गेले तिकडे आपण जाऊ, आपणही पप्पांसारखे तारा होऊ आणि पप्पांबरोबरच तारा होऊन राहू...’ असे सात वर्षीय चिमुकलीने तिच्या मृत पित्याच्या आठवणी काढताना आईकडे व्यथा मांडली. महिलेलाही आपल्या पतीचा विरह सहन होत नसल्याने ‘दोघींच्या आयुष्यात आनंद  नसताना जगण्यात खरंच अर्थ नाही,’ असे सुसाइड नोटमध्ये लिहून स्वत:सह मुलीचाही जीवनप्रवास मातेने कायमचा संपविला. 

हृदय पिळवटून टाकणारी ही घटना शनिवारी येथील विनयनगर परिसरात घडली. सुजाता प्रवीण तेजाळे (३६) व अनया प्रवीण तेजाळे (७) असे या दुर्दैवी मायलेकीचे नाव आहे. शुक्रवारी सुजाता व अनया यांनी चर्चा करून आत्महत्या केल्याचे मृत्यूपूर्व चिठ्ठीतून समोर आले आहे. सुजाता यांनी लिहिलेली भावनिक दोन पानी ‘सुसाइड नाेट’ पाेलिसांच्या हाती लागली आहे. सुजाता यांचे दीर अशाेक तेजाळे हे त्यांच्या राहत्या घरी गेले असता हा सर्व प्रकार उघडकीस आला. 

सुजाता यांचे पती प्रवीण तेजाळे यांचा पाच महिन्यांपूर्वी कोरोनाने मृत्यू झाला होता. सुरुवातीचे काही दिवस अनया शांत होती. मात्र, नंतर सातत्याने तिला पप्पांची आठवण येत असल्याचे सुजाता यांनी सुसाइड नोटमध्ये म्हटले आहे. ‘अनयाला येणारी पप्पांची आठवण अन् मला पतीचा विरह सहन होत नव्हता. एकाकी आयुष्य काढणे खूपच कठीण आहे. जसा जन्म दिला तसेच तिची काळजी करून तिला घेऊन चालले... आईबापाशिवाय अर्थ नाही आणि नवऱ्याशिवायही अर्थ नाही...!’ अशा शब्दांत चिठ्ठी लिहीत त्यांनी चिमुकलीसोबत जीवनप्रवास संपविला.