नात्याला काळीमा! ७ महिन्यांच्या गरोदर महिलेची सासरच्यांनी केली हत्या, २५ तुकडे अन्...

एका महिलेच्या वडिलांनी आरोप केला आहे की, वैयक्तिक वादातून आपल्या विवाहित मुलीची सासरच्या लोकांनी हत्या केली आहे.

पाकिस्तानमध्ये एक धक्कादायक घटना घडली आहे. एका महिलेच्या वडिलांनी आरोप केला आहे की, वैयक्तिक वादातून आपल्या विवाहित मुलीची सासरच्या लोकांनी हत्या केली आहे. यानंतर मुलीच्या मृतदेहाचे २५ तुकडे करण्यात आले. ARY न्यूजनुसार, महिला सात महिन्यांची गर्भवती होती. मुलीचे वडील शब्बीर अहमद यांनी सांगितलं की, मुलीच्या सासरच्या लोकांनी गुन्ह्याची कबुली दिली आहे आणि सध्या ते पोलीस कोठडीत आहेत.

मुलीचे वडील हे स्वतः पोलीस निरीक्षक आहेत. ARY न्यूजला दिलेल्या माहितीनुसार, माझ्या मुलीची उशीने तोंड दाबून हत्या केली आणि तिच्या शरीराचे धारदार चाकूने आणि कटरने २५ तुकडे केले होते. शरीराचे अवयव वेगवेगळ्या बॅगमध्ये ठेवून ते नाल्यात फेकून दिले होते. याप्रकरणी मुलीची सासू, नणंद आणि कुटुंबातील एका व्यक्तीला अटक करण्यात आली आहे. 

पोलीस अधिकाऱ्याने ARY न्यूजला सांगितले की, सासू सुघरा बीबी हिने तिची मुलगी यास्मीनसह मिळून झहरा (२६) हिची हत्या केली आणि मृतदेहाचे तुकडे केले. तुकडे नंतर ते एका पिशवीत भरले आणि कालव्यात फेकले. हात पाय कापले गेले, डोके शरीरापासून वेगळे केले गेले. 

मृतदेहाची ओळख पटू नये म्हणून सासूने तिचे हात पाय कापले. गुन्हा लपविण्यासाठी कुटुंबाने अफवा पसरवली की झहरा कोणासोबत तरी पळून गेली आहे. गुर्जनवालाच्या कोट मंड गावात राहणाऱ्या जहाराचं २०२० मध्ये कोटली मरलानच्या कादिरशी लग्न झालं होतं. परदेशात काम करणाऱ्या कादिरशी अद्याप संपर्क होऊ शकलेला नाही. या घटनेने सर्वांनाच धक्का बसला आहे.