लग्नाचे आमिष दाखवून युवतीवर अत्याचार

Rape Case युवतीला २९ जुलै २०१९ रोजी लग्नाचे आमिष देऊन घरी नेले व युवतीसोबत शारीरिक संबंध प्रस्थापित केले.

ठळक मुद्देसंग्रामपूर तालुक्यातील एका आदिवासी गावात हा प्रकार घडला.

संग्रामपूर : लग्नाचे आमिष दाखवून युवतीच्या इच्छेविरुद्ध सतत लैंगिक शोषण करणाऱ्या एका आरोपीसह त्याला मदत करणाऱ्या दोघांसह तीन आरोपींवर सोनाळा पोलीस स्टेशनला सोमवारी रात्री उशिरा बलात्काराचा गुन्हा दाखल करण्यात आला.

संग्रामपूर तालुक्यातील एका आदिवासी गावात हा प्रकार घडला. २२ वर्षीय युवतीला सन २०१७ पासून गावातीलच युवकाने लग्नाचे आमिष देत इच्छा नसताना लैंगिक शोषण केले. आरोपी आदिल अब्बास सुरत्ने याने पीडित युवतीला २९ जुलै २०१९ रोजी लग्नाचे आमिष देऊन घरी नेले. त्या दरम्यानसुद्धा आरोपीने युवतीसोबत शारीरिक संबंध प्रस्थापित केले. या घटनेत आरोपीला त्याचे भाऊ अबुजर अब्बास सुरत्ने, आबिद अब्बास सुरत्ने या दोघांनी मदत केल्याचे फिर्यादीत नमूद आहे. ही बाब युवतीच्या घरच्यांच्या लक्षात येताच त्यांनी सोनाळा पोलीस स्टेशन गाठले. मात्र काही प्रतिष्ठित नागरिकांनी पीडित युवतीच्या घरच्यांची समजूत काढून आरोपी आदिल सुरत्नेसोबत लग्न लावून देण्याचे ठरविले होते. ३० जुलै २०१९ ला नोटरीच्या माध्यमातून आपसी करारनाम्यात २ जानेवारी २०२० ला लग्न ठरविण्यात आले. या नोटरीवरील करारनाम्यावर आरोपी, प्रतिष्ठित मध्यस्थींच्या छायाचित्रांसह सह्या आहेत. आपसी करारनाम्यात ठरल्याप्रमाणे २ जानेवारी २०२० ला लग्नाच्या दिवशी आरोपी हजर झाला नाही. याबाबत युवतीच्या नातेवाइकांनी आरोपीच्या कुटुबीयांकडे चौकशी केली असता त्यांनी उडवाउडवीची उत्तरे दिली. आरोपीला बाहेरगावी पाठवले. या सर्व प्रकरणात आरोपीला कुटुंबातील दोघांनी पाठबळ दिल्याचे फिर्यादीत नमूद आहे. युवतीच्या फिर्यादीवरून सोनाळा पोलीस स्टेशनला आरोपी आदिल सुरत्ने व मदत करणारे अबुजर सुरत्ने, आबिद सुरत्ने या तिघांवर कलम ३७६(२)(n), ५०४, ५०६ भादंविनुसार गुन्हा दाखल करण्यात आला आहे. या प्रकरणी पुढील तपास सोनाळा पोलीस करीत आहेत.