'आधी म्हणाले वेबसिरीज, घरी गेल्यावर नग्न होण्यास सांगितलं'; तरुणीची तक्रार, मुंबईतील धक्कादायक घटना

मॉडेलने २९ नोव्हेंबर रोजी मुंबईतील चारकोप पोलिस ठाण्यात तक्रार दाखल केली.

मुंबई: मॉडेलची पॉर्न फिल्म बनवत इंटरनेटवर ती अपलोड केल्याप्रकरणी एका महिलेसह चार जणांवर चारकोप पोलिसांनी गुन्हा दाखल केला आहे. परदेशी ग्राहकांसाठी असलेल्या वेब-सिरीजसाठी "बोल्ड" सीन करण्याच्या बहाण्याने फसवणूक केल्याची तक्रार तिने केल्यानंतर ही कारवाई करत एकाला अटक करण्यात आली. तर आरोपी महिलेला दीड वर्षांपूर्वी पॉर्न रॅकेटचा भाग असल्याच्या आरोपावरून अटक करण्यात आली होती. 

चारकोप पोलिसांनी अटक केलेल्या आरोपींची नावे यास्मीन खान, अनिरुद्ध प्रसाद जांगड, अमित पासवान आणि आदित्य अशी आहेत. जांगड हा सध्या पोलिसांच्या ताब्यात असून, इतर फरार आहेत. तक्रारदाराने विविध ब्रँडचे कपडे आणि कपड्यांसाठी जाहिराती केल्या आहेत. आणखी काम मिळण्याच्या आशेने तिने तिचा मोबाईल नंबर, फोटो आणि कामाची माहिती इंस्टाग्राम आणि फेसबुकवर शेअर केली होती. मॉडेलने सांगितले की, राहुल ठाकूर याने सप्टेंबरमध्ये तिच्याशी पहिल्यांदा संपर्क साधला आणि तिला केरशॉ नावाच्या व्यक्तीशी बोलण्यास सांगितले ज्याने तिला राहुल पांडेकडे पाठवले. 

पांडेने मॉडेलला सांगितले की, त्यांना त्यांच्या वेब-सिरीजसाठी "मोबाइल अॅप" नावाच्या ऍप्लिकेशनसाठी अभिनेत्रीची गरज आहे. परंतु त्या व्यक्तीने "बोल्ड सीन्स" करणे आवश्यक आहे. मात्र ही वेब सिरीज भारतात प्रदर्शित होणार असल्याचे समजल्यानंतर ही ऑफर नाकारल्याचे तक्रारदाराने पोलिसांना सांगितले. पांडेने ऑक्टोबरमध्ये मॉडेलकडे पुन्हा प्रस्ताव देत अॅपवर परदेशी क्लायंटसाठी वेब-सिरीज रिलीज केली जाईल असे सांगितले. त्यासाठी तिला ५० हजार रुपये देण्याचेही नक्की झाले. 

पांडेच्या विनंतीनुसार, ती ८ ऑक्टोबर रोजी मालाड स्टेशनवर जांगडला भेटली आणि भाबरेकर नगर येथील एका उंच इमारतीच्या ११ व्या मजल्यावरील फ्लॅटमध्ये नेण्यात आले. फ्लॅटच्या आत, तक्रारदाराला दोन यास्मिन आणि मेकअप आर्टिस्ट तसेच दोन पुरुष भेटले. यास्मीन सीन शूट करत होती आणि तिने मॉडेलला नग्न होण्यास सांगितले. जेव्हा तिने नकार दिला आणि निघून जाण्याचा प्रयत्न केला. तेव्हा यास्मीनने तिला १५ लाख रुपयांच्या मानहानीचा खटला भरण्याची धमकी दिली आणि भीतीपोटी तिने शूट पूर्ण केल्याचे पोलिसांना सांगितले. 

शूटिंगनंतर तिला १० हजार रुपये मानधन मिळाले होते. मात्र २६ नोव्हेंबर रोजी, एका ओळखीच्या व्यक्तीने मॉडेलला सांगितले की तिचा व्हिडिओ एका पॉर्न साइटवर आहे आणि तिच्या नातेवाईक आणि मित्रांच्या सोशल मीडिया ग्रुपमध्ये देखील शेअर केला जात आहे. तिने यास्मीनला व्हिडिओबद्दल विचारले असता तिने अनभिज्ञ असल्याचे सांगितले. मॉडेलने यास्मीनला व्हिडिओ हटवण्यास सांगितले तेव्हा तिने तिचे कॉल घेणे बंद केले. अखेर मॉडेलने २९ नोव्हेंबर रोजी चारकोप पोलिस ठाण्यात तक्रार दाखल केली.