पोलिसानेच पोलिसांकडून रात्रपाळीची ड्युटी न बदलण्यासाठी केली लाचेची मागणी

Bribe Case : राजकुमार उत्तमराव चांदणे (५८)असे आरोपी फौजदाराचे नाव आहे.

ठळक मुद्देराखीव निरीक्षक यांची बदली झाल्यामुळे चांदणेकडे पोलीस निरीक्षकपदाचा पदभार होता. यातच त्याने कर्मचाऱ्यांकडुन वसूली सुरू केल्याची चर्चा सुरू होती.

औरंगाबाद: रात्रपाळीची ड्युटी न बदलण्यासाठी दोन हवालदारांना प्रतीमहा सहा हजार रुपये रुपये लाचेची मागणी करणाऱ्या शहर पोलीस मुख्यालयाच्या फौजदाराला लाचलुचपत प्रतिबंधक विभागाने आज अटक केली. न्यायालयाने त्याची रवानगी हर्सुल कारागृहात न्यायालयीन कोठडीत केली. राजकुमार उत्तमराव चांदणे (५८)असे आरोपी फौजदाराचे नाव आहे.

याविषयी प्राप्त माहिती अशी की, तक्रारदार दोन हवालदार हे पोलीस मुख्यालयात कार्यरत आहेत. राखीव पोलीस उपनिरीक्षक म्हणून आरोपी चांदणे तेथे कार्यरत आहे. आरोपीने त्यांच्या ड्युटी रात्रपाळीवरुन दिवस पाळी अशी केली. तक्रारदार यांना रात्रपाळीची ड्युटी हवी असल्यामुळे त्यांनी राखीव उपनिरीक्षक चांदणे यांच्याकडे विनंती केली असता चांदणेने त्यांना मनासारखे काम हवे असेल तर प्रत्येकी तीन हजार यानुसार दोघांचे ६ हजार रुपये दरमहा देण्यास सांगितले. तक्रारदार हवालदार यांची लाच देण्याची इच्छा नसल्यामुळे त्यांनी थेट लाचलुचपत प्रतिबंधक विभागाकडे चांदणेची तक्रार केली. ८ डिसेंबर रोजीलाचलुचपत प्रतिबंधक चे उप अधीक्षक रुपचंद वाघमारे आणि कर्मचाऱ्यानी लाचेच्या मागणीची पडताळणी केली असता आरोपीने लाच मागितल्याचे सिध्द झाले. एसीबीकडे आपली तक्रार झाल्याचा संशय फौजदार चांदणेला आल्याने त्याने लाचेची रक्कम घेतली नाही. दरम्यान तो रजेवर गेला होता. लाचेची मागणी केल्याचे निष्पन्न झाल्यामुळे आज याप्रकरणी आरोपीविरुध्द बेगमपुरा ठाण्यात गुन्हा दाखल केला. या नंतर एसीबीच्या पोलिसांनी आज दुपारी उपनिरीक्षक चांदणे याला ताब्यात घेतले. त्याला न्यायालयासमोर हजर केले असता न्यायालयाने चांदणे ची रवानगी हर्सुल कारागृहात केली. निवृत्तीला उरले होते अवघे काही दिवस आरोपी फौजदार चांदणे हा सेवानिवृत्तीच्या उंबरठ्यावर होता. त्याने वयाची ५७ वर्ष काही महिने ओलांडली. राखीव निरीक्षक यांची बदली झाल्यामुळे चांदणेकडे पोलीस निरीक्षकपदाचा पदभार होता. यातच त्याने कर्मचाऱ्यांकडुन वसूली सुरू केल्याची चर्चा सुरू होती. दरम्यान एसीबीला तक्रार प्राप्त झाल्यामुळे चांदणे आज पकडल्या गेला.