मुलीवर आधी बलात्कार, नंतर कुटुंबीयांना धमकी; मुंबईतील सांताक्रुझमधील घटना

पोलिसांनी दिलेल्या माहितीनुसार, २०१८ मध्ये मुख्य आरोपी हा तीन वर्षीय पीडितेचा शेजारी होता.

मुंबई : बलात्काराची तक्रार मागे घ्या, अन्यथा तुम्हाला ठार मारू, अशी धमकी चार वर्षीय मुलीच्या कुटुंबीयांना देणाऱ्या चौघांना सोमवारी अटक करण्यात आली. या मुलीवर पाच वर्षांपूर्वी आरोपींनी लैंगिक अत्याचार केला होता. त्यानुसार सांताक्रुझ पोलिसांनी त्यांच्या मुसक्या आवळल्या आहेत. अटक करण्यात आलेल्या आरोपी गुंडांमध्ये अली भाई, राजू झा, घोरी आणि मुख्य आरोपी यांचा समावेश आहे. 

पोलिसांनी दिलेल्या माहितीनुसार, २०१८ मध्ये मुख्य आरोपी हा तीन वर्षीय पीडितेचा शेजारी होता. पीडिता घराबाहेर खेळत असताना आरोपीने तिला त्याच्या राहत्या घरी नेले आणि तिच्यावर बलात्कार केला. आरोपीला तिच्या आईने पकडले आणि तिने पोलिसांना कळवले तेव्हा आरोपीला अटक करण्यात आली. नंतर हे प्रकरण दिंडोशी न्यायालयात वर्ग करण्यात आले. एका पोलीस अधिकाऱ्याने सांगितले की, गेल्या २-३ महिन्यांपासून आरोपी हा त्याचे मित्र अली भाई, राजू झा आणि घोरी यांच्या मदतीने पीडितेला तसेच तिच्या कुटुंबीयांना धमकावत होते.

कुटुंबावर बांबूने हल्ला

६ ऑगस्ट रोजी या प्रकरणाची सुनावणी झाल्यानंतर ती आणि तिचे कुटुंबीय दिंडोशी सत्र न्यायालयात होते. ते घरी पोहोचले असता आरोपी व त्याच्या तीन मित्रांनी मिळून पीडितेच्या कुटुंबावर बांबूने हल्ला केला आणि सर्वांना बेदम मारहाण केली. शेजाऱ्यांनी कुटुंबाला कूपर रुग्णालयात दाखल केले.