कोपर खैरणेतील डान्सबारवर पोलिसांचा छापा 

याप्रकरणी बारबाला व ग्राहक यांच्यावर गुन्हा दाखल करण्यात आला आहे. 

नवी मुंबई : कोपर खैरणेतील मेट्रो या डान्सबारवर पोलिसांनी शुक्रवारी मध्यरात्री छापा टाकून कारवाई केली. शहरात काही ठिकाणी डान्सबार चालत असल्याची माहिती समोर येताच ही कारवाई करण्यात आली आहे. याप्रकरणी बारबाला व ग्राहक यांच्यावर गुन्हा दाखल करण्यात आला आहे. 

अवैध धंद्यांना थारा न देण्याचे पोलिस आयुक्तांचे आदेश असतानाही ठिकठिकाणी डान्सबार, हुक्का पार्लर तसेच मसाज पार्लरच्या नावाखाली देहविक्री चालत आहे. आयुक्त मिलिंद भारंबे यांनी पदभार घेतल्यानंतर या अवैध धंद्यांना पूर्णपणे लगाम लागला होता. मात्र काही महिन्यातच पुन्हा अवैध धंदे पूर्ववत होत असल्याचे चित्र दिसू लागले आहे. त्यात पहाटे पर्यंत चालणाऱ्या डान्सबारच्या माध्यमातून मोठे अर्थकारण होत आहे. 

बारचालक व अधिकारी यांच्यात समन्वय घडवणाऱ्या तुर्भेतील शेट्टीमार्फत ही माया जमा केली जात असल्याच्याही चर्चा आहेत. अशातच कोपर खैरणे येथील मेट्रो बारमध्ये डान्सबार चालवला जात असल्याची माहिती समोर आली होती. याबाबत कोपर खैरणे पोलिसांना माहिती मिळताच शुक्रवारी मध्यरात्री १२ च्या सुमारास त्याठिकाणी छापा टाकण्यात आला. यावेळी तिथल्या बारबाला ग्राहकांसोबत अश्लील नृत्य करताना आढळून आल्या. 

याप्रकरणी त्यांच्यावर कोपर खैरणे पोलिस ठाण्यात गुन्हा दाखल करण्यात आला आहे. यापूर्वी देखील सानपाडा व इतर ठिकाणी पहाटेपर्यंत चालणाऱ्या हुक्का पार्लरवर पोलिसांनी कारवाया केल्या आहेत. अशा कारवायांमधून शहर रात्रीच्या वेळी अद्यापही छुपा अवैध धंदा चालत असल्याचे समोर येत आहे.