मीरारोडच्या ऑर्केस्ट्रा बारवर पोलिसांची धाड 

बारमधील स्टेजवर ७ तरुणी होत्या व त्यातील तिघी नाच करत असल्याचे व्हिडीओ क्लिप द्वारे दिसून आल्या

मीरारोड - मीरारोडच्या रिलायन्स पेट्रोल पंप जवळील सोना ऑर्केस्ट्रा बार मध्ये बेकायदा नृत्य प्रकरणी भाईंदरच्या अनैतिक मानवी वाहतूक प्रतिबंधक  शाखेच्या पोलीस पथकाने धाड टाकून ९ जणांवर गुन्हा दाखल केला . 

शिवार उद्यान जवळील सोना ऑर्केस्ट्रा बार मध्ये गायिका म्हणून कार्यरत असलेल्या बारबाला तंग - तोकड्या कपड्यात बेकायदा नाचत असल्याची माहिती मिळाल्या नंतर पोलीस निरीक्षक समीर अहिरराव सह उमेश पाटील , विजय निलंगे, रामचंद पाटील , सम्राट गावडे , अश्विनी भिलारे , शुभांगी मोकल यांच्या पथकाने २० एप्रिलच्या मध्यरात्री बार वर धाड टाकली. 

बारमधील स्टेजवर ७ तरुणी होत्या व त्यातील तिघी नाच करत असल्याचे व्हिडीओ क्लिप द्वारे दिसून आल्या. या प्रकरणी बारचा व्यवस्थापक , कर्मचारी आदी ८ जणांना पकडून त्यांच्यासह बारचा मालक संजयकुमार ठाकूर अश्या ९ जणांवर मीरारोड पोलीस ठाण्यात गुन्हा दाखल करण्यात आला आहे.