पुण्यातील तरुणाचा गुवाहाटीच्या हॉटेलमध्ये खून: मोबाइलमध्ये होते प्रेयसीचे न्यूड फोटो 

पंचतारांकित हॉटेलमध्ये एक व्यक्ती मृतावस्थेत आढळल्याची माहिती मिळताच पोलीस तात्काळ घटनास्थळी दाखल झाले.

गुवाहाटी : लव्ह ट्रँगलमधून गुवाहाटीच्या एका पंचतारांकित हॉटेलमध्ये खळबळजनक घटना घडली आहे. तरुणीने आपल्या नव्या प्रियकराच्या मदतीने ४२ वर्षीय जुन्या प्रियकराचा खून केला आहे. संदीप सुरेश कांबळी असं खून झालेल्या व्यक्तीचं नाव असून ते मूळचे पुण्यातील रहिवासी होते.

पोलिसांकडून मिळालेल्या माहितीनुसार, गुवाहाटी विमानतळाच्या जवळच असणाऱ्या एका पंचतारांकित हॉटेलमध्ये सोमवारी दुपारी संदीप कांबळी यांचा मृतदेह आढळून आला. या प्रकरणातील आरोपी अंजली शॉ आणि तिचा नवा प्रियकर राकेश शॉ हे दोघे कोलकात्याला पळून जाण्याच्या तयारीत होते. मात्र पोलिसांनी ताबोडतोब तपासाची चक्रं फिरवली आणि आरोपींना बेड्या ठोकल्या.

अंजली ही २५ वर्षीय तरुणी संदीप कांबळी यांच्यासोबत रिलेशनशीपमध्ये होती. मात्र मागील वर्षी दोघांमध्ये वाद झाला आणि अंजलीने संदीपपासून वेगळं होण्याचा निर्णय घेतला. त्यानंतर अंजली ही राकेश शॉ या तरुणाच्या प्रेमात पडली. त्यानंतर राकेश याने अंजलीकडे लग्नासाठी तगादा लावला. मात्र संदीप कांबळी याच्याकडे अंजलीचे काही न्यूड फोटो होते. त्यामुळे अंजलीने संदीप कांबळी याला भेटायचं ठरवलं. ही भेट आधी कोलकाता विमानतळावर ठरली होती. मात्र संदीपने भेटीचं ठिकाण बदलून गुवाहाटी केलं. त्यानंतर संदीपची भेट घेण्यासाठी अंजली ही कोलकात्यातून आपला प्रियकर राकेश याच्यासोबत गुवाहाटीला गेली. संदीपने तेथील एका पंचतारांकित हॉटेलमध्ये अंजली आणि त्याच्यासाठी एक रूम बुक केली होती. राकेशनेही संदीपला न कळवता त्याच हॉटेलमध्ये स्वत:साठी एक रूम बुक केली. त्यानंतर ठरल्याप्रमाणे अंजली ही संदीपच्या भेटीसाठी गेली. मात्र तिने तिथे एकटीने न जाता राकेशलाही सोबत घेतलं.

भेटीसाठी अंजली ही एकटी न येता तिच्यासोबत तिचा नवा प्रियकर राकेश हा देखील आल्याचं पाहून संदीपचा पारा चढला. त्यानंतर दोघांमध्ये वाद सुरू झाला आणि या वादाचं रुपांतर नंतर हाणामारीत झालं. याच हाणामारीत संदीप गंभीर जखमी झाला आणि त्याने जागीच प्राण सोडले.

दरम्यान, पंचतारांकित हॉटेलमध्ये एक व्यक्ती मृतावस्थेत आढळल्याची माहिती मिळताच पोलीस तात्काळ घटनास्थळी दाखल झाले. पोलिसांनी सीसीटीव्ही फुटेज आणि हॉटेलमधील कामगारांकडून मिळालेल्या माहितीच्या आधारे तपासास सुरुवात केली आणि काही तासांतच आरोपी अंजली आणि राकेश यांना बेड्या ठोकल्या. याप्रकरणी पोलिसांकडून अधिक तपास सुरू असून दोन्ही आरोपींची चौकशी केली जात आहे.