गायिका जस्मिन सँडलसला लॉरेन्स बिश्नोई गँगकडून जिवे मारण्याची धमकी!

जस्मिन सँडलस राहत असलेल्या हॉटेलमध्ये सुरक्षा पुरवण्यात आली असून या प्रकरणाची चौकशी सुरू असल्याचे पोलीस अधिकाऱ्यांनी सांगितले. 

नवी दिल्ली : एका कार्यक्रमासाठी दिल्लीत पोहोचल्यानंतर जीवे मारण्याच्या धमक्या आल्याचा आरोप अमेरिकेत राहणारी प्रसिद्ध पंजाबी गायिका जस्मिन सँडलसने (jasmine Sandlas) केला आहे. दरम्यान, कॉल करणाऱ्या व्यक्तीने गायिकेला धमकी देताना तुरुंगात असलेल्या गँगस्टर लॉरेन्स बिश्नोईचा उल्लेख केला होता. तसेच, जस्मिन सँडलसला जवाहरलाल नेहरू स्टेडियममध्ये परफॉर्म करायला सांगितले होते, अशी माहिती दिल्ली पोलिसांच्या वरिष्ठ अधिकाऱ्यांनी दिली आहे.

अधिकाऱ्यांनी सांगितले की, ज्या फोनवरून जस्मिन सँडलसला धमकी देण्यात आली, तो एक आंतरराष्ट्रीय नंबर होता. जस्मिन सँडलसच्या कर्मचाऱ्यांनी तात्काळ उत्तर-पश्चिम दिल्ली पोलिसांशी संपर्क साधला. याचबरोबर, जस्मिन सँडलस राहत असलेल्या हॉटेलमध्ये सुरक्षा पुरवण्यात आली असून या प्रकरणाची चौकशी सुरू असल्याचे पोलीस अधिकाऱ्यांनी सांगितले. 

यापूर्वी दिल्ली पोलीस आणि इतर एजन्सींच्या तपासात असे समोर आले आहे की, लॉरेन्स बिश्वोईने बॉलिवूड अभिनेता सलमान खानसह अनेक बड्या व्यक्तींना जीवे मारण्याची धमकी दिली होती. दरम्यान, लॉरेन्स गँगचा सलमान खानला मारण्याचा प्लॅन तीनदा अपयशी ठरला आहे. गँगस्टर लॉरेन्स बिश्नोई सध्या अंमली पदार्थांच्या तस्करीच्या आरोपाखाली अहमदाबाद तुरुंगात आहे, त्याची एनआयएकडून चौकशी सुरू आहे. गायक सिद्धू मूसवाला खून प्रकरणातही लॉरेन्स बिश्नोई आरोपी आहे. दिल्ली पोलीस आणि एनआयए आरोपी लॉरेन्स बिश्वोईची चौकशी करत आहेत.

दरम्यान, पंजाब इंडस्ट्रीतील प्रसिद्ध गायिका जस्मिन सँडलस हिच्या परिचयाची गरज नाही. आपल्या दमदार परफॉर्मेंसने सर्वांची मने जिंकणारी जस्मिन सँडलस केवळ पंजाबमध्येच नाही तर जगभरातील अनेक देशांमध्ये स्टेज शो करते. जस्मिन सँडलसचे चाहते तिचा जादुई आवाज लाईव्ह ऐकण्यासाठी आतुरतेने वाट पाहत असतात.