अश्लील हावभाव, सोशल डिस्टन्सचा फज्जा उडवणाऱ्या बारवर छापा, 56 जण ताब्यात

Raid On Bar : याप्रकरणी केलेल्या कारवाईत बारचालक, मॅनेजर, वेटर महिला व ग्राहक अशा 56 जणांना ताब्यात घेऊन त्यांना स्थानिक मानपाडा पोलिसांच्या हवाली केले.

ठळक मुद्देबारमधील 56 जणांना ताब्यात घेण्यात आले. यात 21 महिला वेटर, 30 ग्राहक, बारचालक आणि अन्य वेटर अशा 5 जणांचा समावेश आहे.

डोंबिवली: शिथिल केलेल्या निर्बंधात कोरोनाचे नियम पाळून व्यवसाय करण्यास मुभा दिली असताना मानपाडा पोलिस ठाण्याच्या हद्दीत असलेल्या मोनालिसा रेस्टॉरंट आणि बारमध्ये कोरोनाचे नियम धाब्यावर बसविले गेले. कल्याण गुन्हे अन्वेषण विभागाच्या पोलिसांनी टाकलेल्या धाडीत त्याठिकाणी महिला वेटर विनामास्क होत्या तसेच तोकडया कपडयात ग्राहकांशी अश्लील कृती व हावभाव करताना आढळून आल्या. याप्रकरणी केलेल्या कारवाईत बारचालक, मॅनेजर, वेटर महिला व ग्राहक अशा 56 जणांना ताब्यात घेऊन त्यांना स्थानिक मानपाडा पोलिसांच्या हवाली केले.

हा बार कल्याण पुर्वेकडील हाजीमलंग रोडवर आहे. या ठिकाणी कोरोनाचे नियमांचे उल्लंघन करून गाण्यांवर चाललेल्या महिलांच्या अश्लील हावभाव आणि कृत्याकडे स्थानिक मानपाडा पोलिसांचा कानाडोळा झाला असताना कल्याण गुन्हे अन्वेषण विभागाचे वरीष्ठ पोलिस निरिक्षक विलास पाटील यांना गुप्त बातमीदारमार्फत माहीती मिळाली की संबंधित बारच्या मालक आणि चालकांकडे परवाना नसतानाही त्याठिकाणी ग्राहकांना लेडीज सर्व्हिस  देवून ग्राहकांना आकर्षित करणेकरीता महिलांना तोकडे कपडे परिधान करण्यास लावून हावभाव करून अश्लीक कृत्य करीत आहेत.  मिळालेल्या माहीतीनुसार पाटील यांच्या पथकाने संबंधित बारवर छापा टाकला असता बातमीदाराने दिलेल्या माहीतीप्रमाणे त्याठिकाणी गैरकृत्य सुरू असल्याचे दिसून आले.

महिला वेटरांच्या तोंडावर मास्क ही नव्हते तर सोशन डिस्टन्सचा फज्जा देखील उडाला होता. बारमधील 56 जणांना ताब्यात घेण्यात आले. यात 21 महिला वेटर, 30 ग्राहक, बारचालक आणि अन्य वेटर अशा 5 जणांचा समावेश आहे. घटनास्थळावरून पोलिसांनी 63 हजार 410 रूपयांची रोकड आणि 14 हजार 500 रूपयांचे गाणी वाजविण्याचे साहीत्य असा 77 हजार 910 रूपयांचा मुद्देमाल जप्त केला आहे.