धक्कादायक! विश्व हिंदू परिषदेच्या नेत्याची भररस्त्यात गोळ्या झाडून हत्या, घटनेने खळबळ

Vishwa Hindu Parishad leader Mukesh Soni : विश्व हिंदू परिषद आणि बजरंग दलाचे खलारी ब्लॉक अध्यक्ष मुकेश सोनी यांची खलारी पोलीस स्टेशन हद्दीतील मॅक्लुस्कीगंजजवळ गोळ्या झाडून हत्या करण्यात आली.

नवी दिल्ली - झारखंडची (Jharkhand) राजधानी रांची (Ranchi) मध्ये एक धक्कादायक घटना घडली आहे. विश्व हिंदू परिषदेच्या (Vishwa Hindu Parishad) नेत्याची हत्या करण्यात आली आहे. मिळालेल्या माहितीनुसार, विश्व हिंदू परिषद आणि बजरंग दलाचे खलारी ब्लॉक अध्यक्ष मुकेश सोनी (Mukesh Soni) यांची बुधवारी खलारी पोलीस स्टेशन हद्दीतील मॅक्लुस्कीगंजजवळ गोळ्या झाडून हत्या करण्यात आली. मुकेश सोनी हे खलारी येथील महावीर नगरमध्ये राहत होते आणि मॅक्लुस्कीगंज येथील धुर्वा मोरजवळ प्रधान ज्वेलर्स नावाचं दागिन्यांचं दुकान होतं.

मुकेश संध्याकाळी आपलं दुकान बंद करून घरी परत जात होते. याच दरम्यान, बकुळीया तांडजवळ त्याच्यावर दोन गोळ्या झाडण्यात आल्या. एका नागरिकाने दिलेल्या माहितीवरून काही लोकांनी घटनास्थळ गाठून जखमी मुकेश सोनी यांना डाक्रा रुग्णालयात नेलं, मात्र तोपर्यंत त्यांचा मृत्यू झाला होता. मुकेश यांच्या हत्येची माहिती मिळताच संपूर्ण खलारीमध्ये तणावाचे वातावरण निर्माण झालं आहे. अलीकडच्या काळात मुकेश फायर ब्रँड हिंदू नेता म्हणून आपली छाप पाडत होते. पोलीस या प्रकरणाचा अधिक तपास करत आहेत.

भाजपा आणि संघ विचार परिवाराच्या कार्यकर्त्यांना केलं जातं टार्गेट 

स्थानिक आमदार समरीलाल यांनी या घटनेचा तीव्र शब्दात निषेध केला असून या घटनेच्या निषेधार्थ विधानसभेच्या अधिवेशनाच्या पहिल्या दिवशी जाणार नसून खलारी येथे जाणार असल्याचं सांगितलं आहे. विश्व हिंदू परिषद खलारी ब्लॉक अध्यक्ष मुकेश सोनी यांची गोळ्या झाडून हत्या केल्याप्रकरणी खासदार संजय सेठ यांनी तीव्र निषेध व्यक्त केला आहे. भाजपा, आरएसएस, विश्व हिंदू परिषद या संघटनांच्या कार्यकर्त्यांना लक्ष्य केलं जात आहे. भाजपा आणि संघ विचार परिवाराच्या कार्यकर्त्यांना टार्गेट केलं जात असल्याचं खासदार यांनी म्हटलं आहे.

झारखंडला केरळ आणि पश्चिम बंगाल बनवण्याचा डाव

टार्गेट करून नुकसान केलं जात आहे. त्यांची हत्या केली जात आहे. झारखंडला केरळ आणि पश्चिम बंगाल बनवण्याचे षडयंत्र सुरू असल्याचं देखील खासदारांनी म्हटलं आहे. दुकान बंद करून घरी जात असणाऱ्या एका व्यावसायिकाची आणि सामान्य नागरिकाची हत्या केली जाते ही अत्यंत दु:खद घटना आहे. झारखंडमधील गुन्हेगारी देखील वाढत असल्याचं हे उदाहरण आहे. तसेच गुन्हेगारांना राजकीय संरक्षण देखील मिळत आहे. त्यामुळेच ते अशा प्रकारचं कृत्य करत असल्याच देखील म्हटलं आहे. एका हिंदी वेबसाईटने याबाबतचे वृत्त दिले आहे.