गुंगीचे औषध देऊन तरुणीवर बलात्कार; गर्भवती राहिल्यानंतर गर्भपात करण्याचा प्रयत्न

आरोपी शमशाद अन्सारी आणि पीडित तरुणी हे दोघे रहातोली इथल्या जीन्स वॉश कारखान्यात एकाच ठिकाणी कारखान्यात काम करीत होते.

पंकज पाटील

बदलापूर: बदलापूर ग्रामीण भागामध्ये एका आदिवासी तरुणीवर बलात्कार केल्याची घटना समोर आली आहे. या तरुणीवर सतत बलात्कार केल्यामुळे ती गर्भवती झाली होती. तिचा गर्भपात करण्यासाठी आरोपीने रुग्णालयात नेले असता त्यावेळेस हा प्रकार उघड झाला. अखेर त्या तरुणीच्या तक्रारीवरुन आरोपींच्या विरोधात गुन्हा दाखल करण्यात आला आहे. 

आरोपी शमशाद अन्सारी आणि पीडित तरुणी हे दोघे रहातोली इथल्या जीन्स वॉश कारखान्यात एकाच ठिकाणी कारखान्यात काम करीत होते. अन्सारी याने या तरुणीच्या जेवणात गुंगीचे औषध टाकून ती बेशुद्ध अवस्थेत असताना तिच्यावर बलात्कार केला आणि त्यांच्या शरीरसंबंधाची व्हिडिओ काढून ती व्हिडिओ त्या तरुणीला दाखवून सतत तिच्यावर बलात्कार करीत राहिला. शरीर संबंधाचे व्हिडीओ त्याच्याकडे असल्याने त्या तरुणीने देखील भीतीपोटी तक्रार करण्यास टाळले. या तरुणीवर सतत बलात्कार झाल्याने ती गर्भवती राहिली होती. याची माहिती आरोपी अन्सारी यांना मिळताच त्याने आपले दोन सहकारी मित्र सागर कदम आणि मुकेश दिनगर यांच्या मदतीने तिचा गर्भपात करण्याचा प्रयत्न केला. आरोपींनी पीडित तरुणीला गर्भपातासाठी रुग्णालयात नेले असता त्या तरुणीकडे चौकशी केली असता घडल्या प्रकाराची माहिती समोर आली. त्यानंतर संबंधित पीडित तरुणीच्या तक्रारीवरुन आरोपी शमशाद अन्सारी आणि त्याचे दोन सहकारी सागर कदम आणि मुकेश दिनगर यांच्या विरोधात गुन्हा दाखल केला आहे. गुन्हा दाखल झाल्यानंतर कदम आणि मुकेश यांना पोलिसांनी अटक केली असून मुख्य आरोपी अन्सारी हा अद्यापही पोलिसांच्या हाती लागलेला नाही.