खळबळजनक! "साहिलने रागाच्या भरात नाही तर कट रचून केली हत्या; 3 दिवस बनवत होता प्लॅन"

एका तरुणाने आपल्या गर्लफ्रेंडची सार्वजनिक ठिकाणी चाकूने वार करून निर्घृण हत्या केली होती. या घटनेत रोज नवनवीन खुलासे होत आहेत.

दिल्लीतील शाहबाद डेअरी भागातील रस्त्यावर एका तरुणाने आपल्या गर्लफ्रेंडची सार्वजनिक ठिकाणी चाकूने वार करून निर्घृण हत्या केली होती. या घटनेत रोज नवनवीन खुलासे होत आहेत. याप्रकरणी पोलिसांनी आणखी एक मोठा खुलासा केला आहे. या 16 वर्षांच्या मुलीची निर्घृण हत्या ही रागाच्या भरात नाही तर कट रचून केली असल्याचं तपासात सहभागी अधिकाऱ्यांनी सांगितलं आहे. 

हिंदुस्तान टाईम्समध्ये प्रसिद्ध झालेल्या वृत्तानुसार, अधिकाऱ्यांनी सांगितले की, हा वाद हा रागाच्या भरात झालेला नाही. ही पूर्वनियोजित हत्या होती. पोलिसांनी दिलेल्या माहितीनुसार, रविवारी 20 वर्षीय तरुण मुलगी राहत असलेल्या गल्लीत थांबला होता. सार्वजनिक शौचालयातून ती बाहेर आल्यावर आरोपी तरुणीसमोर आला. यानंतर त्याने मुलीवर चाकूने अनेक वार केले आणि तिला दगडाने ठेचलं. पण तेथून जाणाऱ्या लोकांनीही मुलीला वाचवण्याचा प्रयत्न केला नाही.

हत्येसाठी वापरलेला चाकू साहिलने हरिद्वारमधून विकत घेतल्याचं पोलीस अधिकाऱ्यांनी सांगितलं, मात्र तो कधी आणि का विकत घेतला हे स्पष्ट झालं नाही. विशेष पोलीस आयुक्त (कायदा व सुव्यवस्था) दीपेंद्र पाठक म्हणाले, "साहिलने पोलिसांना सांगितले की गुरुवारी झालेल्या भांडणानंतर त्याने मुलीवर राग व्यक्त केला होता, जिथे मुलीने त्याचा अपमान केल्याचा आरोप आहे." पाठक पुढे म्हणाले, 'ही पूर्वनियोजित हत्या होती. आणि त्याला कठोरात कठोर शिक्षा मिळावी यासाठी आम्ही एक मजबूत केस तयार करत आहोत.

"अजिबात पश्चाताप नाही, ती मला इग्नोर करायची म्हणून..."; साहिलची कबुली    

आरोपी साहिलने दिल्ली पोलिसांसमोर आपला गुन्हा कबूल केला आहे. त्याला त्याच्या कृत्याबद्दल कोणताही पश्चाताप नसल्याचं त्याने म्हटलं आहे. दिल्ली पोलिसांच्या चौकशीत साहिलने आपल्याला गुन्हा केल्याचा कोणताही पश्चाताप नसल्याचं सांगितलं आहे. साहिलने सांगितले की, घटनेच्या वेळी तो खूप संतापला होता. यामागचे कारण असेही आहे की, अनेक दिवसांपासून मुलगी त्याच्याकडे दुर्लक्ष करत होती. मुलीला साहिलसोबत ब्रेकअप करायचे होते, असे सांगितले जात आहे. त्यामुळेच तिने साहिलपासून दूर व्हायला सुरुवात केली, त्य़ाला हे सहन होत नव्हतं.