धक्कादायक! "भाई "ला वाढदिवसाच्या शुभेच्छा देण्यासाठी येरवडा जेलबाहेर फटाक्याची आतषबाजी

Yerwada jail : अशा घटनांमुळे गुन्हेगार व त्यांच्या टोळ्यांची दहशत दिवसेंदिवस वाढत असून पोलिसांकडून कठोर उपाययोजना होणे आवश्यक आहे.

येरवडा - "भाई "ला वाढदिवसाच्या शुभेच्छा देण्यासाठी येरवडा जेलबाहेर फटाक्याची आतषबाजी करत त्याचा व्हिडिओ सोशल मीडियावर व्हायरल केल्याचा धक्कादायक प्रकार नुकताच उघडकीस आला आहे. 

खून - मारामारी अशा गंभीर गुन्ह्यातील सराईत गुन्हेगार आकाश कंचिले याच्या वाढदिवसानिमित्त येरवडा जेल बाहेर त्याच्या समर्थकांनी  फटाक्याची आतषबाजी केली. एवढ्यावरच न थांबता या सेलिब्रेशनचे व्हिडीओ सोशल मीडियावर व्हायरल केले. या घटनेमुळे परिसरातील भाईंच्या टोळ्यांचे प्रस्थ दिवसेंदिवस वाढत आहे. येरवड्यातील गुन्हेगारी टोळ्यांची वाढती संख्या, त्यामुळे परिसरात गुन्हेगारी यावर पोलिसांनी अंकुश ठेवणे आवश्यक आहे. आकाश कंचिले  याच्यावर खून मारामारी असे गंभीर स्वरूपाचे गुन्हे दाखल आहेत. लॉकडाऊन काळात येरवडा जेल मधून सुटलेल्या नितीन कसबे याचा शादल बाबा चौकात अवघ्या काही तासात आकाश कंचीले व त्याच्या टोळीतील सदस्यांनी अत्यंत निर्घृणपणे खून केला होता. या खूनाच्या गुन्ह्यात त्याला अटक करण्यात आली असून तो या गुन्ह्यात येरवडा जेलमध्ये आहे. येरवडा परिसरात असणारे त्याचे समर्थक यांची अजूनही दहशत आहे. शुक्रवार पाच फेब्रुवारी रोजी त्याचा वाढदिवस होता.  त्याच्या समर्थकांनी येरवडा जेल बाहेरील एअरपोर्ट रस्त्यावर फटाक्यांची आतषबाजी केल्याचा व्हिडीओ तयार करून सोशल मीडिया वरून वायरल केला आहे. एवढेच नाही तर "किंग ऑफ येरवडा" असे इतर व्हिडिओ देखील तयार करून  वायरल करण्यात आलेले आहेत.  एकंदरीतच या भाई समर्थकांना कोणाची भीती राहिलेली नाही. आपल्या टोळ्यांचे वर्चस्व दाखवण्यासाठी गुन्हेगार  व त्यांचे समर्थक अशाप्रकारे सोशल मीडियाचा सर्रासपणे वापर करत आहेत. यामुळे सर्वसामान्य नागरिक दहशतीच्या वातावरणात खाली वावरत आहेत. अशा घटनांमुळे गुन्हेगार व त्यांच्या टोळ्यांची दहशत दिवसेंदिवस वाढत असून पोलिसांकडून कठोर उपाययोजना होणे आवश्यक आहे.