धक्कादायक! पिंपरी-चिंचवड पोलीस आयुक्तालयाजवळ भरदिवसा महिलेवर बलात्कार

Rape Case : प्रेमलोक पार्क, चिंचवड येथे १६ मे रोजी दुपारी सव्वादोनच्या सुमारास ही घटना घडली.   

पिंपरी : महिला अत्याचाराच्या घटना सातत्याने समोर येत असतानाच पिंपरी-चिंचवड पोलीस आयुक्तालयापासून हाकेच्या अंतरावर भर दिवसा महिलेवर लैंगिक अत्याचार झाला. बलात्कार प्रकरणी गुन्हा दाखल करून पोलिसांनी एका वाॅचमनला अटक केली. प्रेमलोक पार्क, चिंचवड येथे १६ मे रोजी दुपारी सव्वादोनच्या सुमारास ही घटना घडली.   

याप्रकरणी २८ वर्षीय महिलेने रविवारी (दि. २९) चिंचवड पोलीस ठाण्यात फिर्याद दिली. त्यानुसार, सरोज देवीराम बिस्ता (वय २८, प्रेमलोक पार्क, चिंचवड मूळ रा. नेपाळ) याच्या विरोधात गुन्हा दाखल करून पोलिसांनी त्याला अटक केली. पोलिसांनी दिलेल्या माहितीनुसार, फिर्यादी महिला १६ मे रोजी जेवण झाल्यानंतर दुपारी प्रेमलोक पार्क येथे पिंपरी-चिंचवड पोलीस आयुक्तालयाजवळ पायी फेरफटका मारत होती. त्यावेळी आरोपी वाॅचमनने फिर्यादी महिलेला जवळ बोलावले. त्यानंतर त्यांना जवळच असलेल्या पत्रा शेडमध्ये घेऊन गेला. तेथे आरोपीने फिर्यादी महिलेशी अश्लील चाळे केले. महिलेने आरडाओरडा करून प्रतिकार केला. फिर्यादी महिलेचे घर खाली करण्यास सांगेन, अशी धमकी देऊन आरोपीने फिर्यादी महिलेवर बळजबरीने लैंगिक अत्याचार केले, असे फिर्यादी नमूद आहे. 

याप्रकरणी पीडित महिलेने तक्रार केल्यानंतर गुन्हा दाखल करण्यात आला. चिंचवड पोलिसांनी आरोपीला अटक केली असून, त्याला पोलीस कोठडी सुनावण्यात आली. पोलीस उपनिरीक्षक व्यंकट पोटे तपास करीत आहेत.