धक्कादायक! शाळकरी विद्यार्थी धावत्या बसमध्ये करत होते मद्यपान, व्हिडीओ व्हायरल

Video Viral : या घटनेचा व्हिडिओ सोशल मीडियावर व्हायरल झाला असून त्याची सखोल चौकशी केली जात आहे. 

चेन्नई : शाळकरी विद्यार्थी धावत्या बसमध्ये मद्यपान करत असल्याची धक्कादायक घटना समोर आली आहे. तमिळनाडूतील चेंगलपट्टू येथे ही धक्कादायक घटना घडली आहे. या घटनेचा व्हिडिओ सोशल मीडियावर व्हायरल झाला असून त्याची सखोल चौकशी केली जात आहे. 

शालेय विद्यार्थ्यांचा चालत्या बसमध्ये दारू पितानाचा व्हिडिओ सोशल मीडियावर व्हायरल झाला आहे. ही घटना तामिळनाडूच्या चेंगलपट्टू जिल्ह्यात घडली. व्हिडिओमध्ये शालेय गणवेशातील मुली आणि मुलांचा एक गट बिअर पित असल्याचे दिसत आहे. विद्यार्थी बिअरची बाटली उघडून पिताना आणि नंतर ती बाटली एकमेकांना देताना दिसतात. सर्व विद्यार्थी चेंगलपट्टू येथील सरकारी शाळेतील असल्याचे समजते. ही घटना 22 मार्च रोजी घडली. विद्यार्थी बसमधून तिरुकाझुकुंद्रम ते ठाचूरला जात होते. बसमध्ये चढलेल्या एका मुलीने तिच्या पिशवीतून बिअरची बाटली काढली, ती उघडली आणि मद्यपान करू लागले. हे पाहून इतर मुलींनीही ती बाटली घेतली आणि मद्यपान केले. इतर प्रवाशांनी त्यांच्या वागण्यावर प्रश्न विचारल्यावर मुली आरडाओरडा करू लागल्या.

व्हिडिओ सोशल मीडियावर व्हायरल झाल्यानंतर अधिकाऱ्यांनी घटनेची गंभीर दखल घेतली असून पोलिस चौकशी करत असल्याचे जिल्हा शिक्षणाधिकाऱ्यांनी सांगितले. या प्रकरणाची चौकशी पूर्ण झाल्यानंतर पोलिस योग्य ती कारवाई करतील, असंही ते पुढे म्हणाले.