धक्कादायक! लग्न जमवत नाहीत म्हणून मुलाने फरशी मारून केला वडिलांचा खून

पंढरपुरातील घटना

पंढरपूर: वडील लग्न जमवत नसल्याने संतप्त मुलाने वडिलांच्या डोक्यात फरशी मारून वडिलांच्या खुनाचा प्रयत्न केल्याची घटना रविवारी रात्री उशिरा घडली. या घटनेत गंभीर जखमी झालेल्या वडिलांचा उपचारा दरम्यान मृत्यू झाला. या घटनेने पंढरपूर शहरात खळबळ उडाली.

गोपिचंद उर्फ जितू हुकुम कदम (वय २८, रा. भगवान नगर, पंढरपूर) आणि हुकुम माणिक कदम (वय ५८) हे नात्याने मुलगा - वडील आहेत. गोपिचंद हा वडिलांकडे लग्न करुन द्या म्हणून हट्ट धरून बसला होता. रविवारी रात्री सव्वा नऊच्या सुमारास गोपिचंद याने हुकुम कदम यांना "तू माझे लग्न करीत नाही, तुला मी आता ठेवत नाही' असे म्हणून शिवागाळ सुरू केली. त्याचबरोबर त्याने हुकूम यांना जिवे ठार मारण्याचे उद्देशाने घरासमोर पडलेले फरशाच्या तुकडयाने व लाकडी फळीच्या तुकडयाने तोंडावर मारहाण केली. या मारहाणीत हुकुम गंभीर जखमी झाले.

वडीलांना उपचारासाठी रुग्णालयात दाखल करण्यात आले होते. मात्र त्यांची प्रकृती अधिक चिंताजनक झाली होती. त्यांचा उपचारादरम्यान मृत्यू झाला आहे. ही घटना समजताच उपविभागीय पोलीस अधिकारी डॉ. अर्जुन भोसले, पोनि अरुण फुगे, सपोनि प्रकाश भुजबळ, पोसई प्रशांत भागवत यांनी भेट दिली आहे. पुढील तपास प्रकाश भुजबळ करीत आहेत.