न्यायालयात पोलीस संरक्षणात असलेल्या आरोपींवर गोळीबार: उत्तर प्रदेशातील घटना

न्यायालयात तारखेसाठी आणलेल्या आरोपींवर गोळीबार, हल्लेखोर ताब्यात.

UP Firing: काही दिवसांपूर्वी पोलीस संरक्षणात असलेल्या माफिया अतिक अहमद आणि त्याचा भाऊ अशरफ यांच्या हत्येची घटना घडली होती. अशाच प्रकारची एक घटना जौनपूरच्या दिवाणी न्यायालयात घडली आहे. हत्या प्रकरणातील दोन आरोपींना आज न्यायालयात हजर करण्यात आले होते, यावेळी काही हल्लेखोरांनी त्या दोघांवर गोळीबार सुरू केला. 

6 मे 2022 रोजी गौराबादशाहपूर पोलिस स्टेशन हद्दीतील धर्मपूर येथे कुस्तीपटू बादल यादव यांची हत्या झाली होती. त्या हत्येत सूर्य प्रकाश राय आणि मिथिलेश गिरी हे आरोपी आहेत. या दोघांनाही आज दिवाणी न्यायालयात हजर करण्यात आले होते. जिल्हा दंडाधिकारी कार्यालयाशेजारील दिवाणी न्यायालयात पोहोचताच हल्लेखोरांनी दोन्ही आरोपींवर गोळीबार सुरू केला. 

यावेळी घटनास्थळी उपस्थित वकिलांनी हल्लेखोरांना पकडून पोलिसांच्या ताब्यात दिले. घटनेची माहिती मिळताच पोलीस अधिकारी मोठ्या संख्येने पोलीस फौजफाट्यासह दिवाणी न्यायालयात दाखल झाले. जखमी सूर्यप्रकाश राय आणि मिथिलेश गिरीलाही जिल्हा रुग्णालयात नेण्यात आले. येथे प्राथमिक उपचारानंतर दोघांना वाराणसीला रेफर करण्यात आले आहे. दोघांची प्रकृती गंभीर आहे.