विकृतीचा कहर! …म्हणून तो मंदिरांच्या दानपेटीमध्ये टाकायचा वापरलेले कंडोम, धक्कादायक कारण आलं समोर

Crime News: मंदिरांच्या दानपेट्यांमध्ये वापरलेले कंडोम टाकणाऱ्या एका विकृत व्यक्तीला कर्नाटक पोलिसांनी अटक केली आहे. आरोपीचे नाव Devdas Desai असून, पोलिसांनी केलेल्या चौकशीमध्ये आरोपीने असे कृत्य करण्यामागच्या धक्कादायक कारणाचा उलगडा केला आहे.

बंगळुरू - मंदिरांच्या दानपेट्यांमध्ये वापरलेले कंडोम टाकणाऱ्या एका विकृत व्यक्तीला कर्नाटक पोलिसांनी अटक केली आहे. आरोपीचे नाव देवदास देसाई असून, पोलिसांनी केलेल्या चौकशीमध्ये आरोपीने असे कृत्य करण्यामागच्या धक्कादायक कारणाचा उलगडा केला आहे. आरोपीने पोलिसांना सांगितले की, येशूचा संदेश पोहोचवण्यासाठी तो असे कृत्य करत असे. तसेच या कृत्याचा आपल्याला कुठलाही पश्चात्ताप नसल्याचेही त्याने सांगितले आहे. पोलीस गेल्या वर्षभरापासून या आरोपीचा तपास करत होते. मंदिरातील दानपेट्यांमध्ये वापरलेले कंडोम टाकून तो फरार होत असे.

याबाबत समोर आलेल्या वृत्तानुसार ६२ वर्षीय आरोपी देवदास देसाई हा मंगळुरूमधील अनेक मंदिरांमध्ये जाऊन असे कृत्य करून आला आहे. बऱ्याच काळापासून पोलीस त्याच्या शोधात होते. मात्र तो नेहमीच पोलिसांच्या हाती तुरी देऊन फरार होत असे. गेल्या वर्षी २७ डिसेंबर रोजी कोरज्जाना कट्टे गावातील एका मंदिरातील दान पेटीमध्ये वापरलेला कंडोम टाकल्याची घटना घडली होती. तेव्हापासून पोलीस त्याचा शोध घेत होते. दरम्यान अखेर आता तो पोलिसांच्या जाळ्यात पोहोचला आहे.

अशा प्रकारची घटना घडल्यानंतर पोलिसांनी मंदिर आणि आसपासच्या परिसरातील कॅमेरे तपासले. जेव्हा अधिकाऱ्यांनी सीसीटीव्ही फुटेज तपासले तेव्हा त्यामध्ये आरोपीचा चेहरा दिसून आला. त्याआधारावर पोलिसांनी त्याला अटक केली. चौकशीमध्ये देवदास देसाई याने त्याने अशाप्रकारे अनेक मंदिरांना अपवित्र केल्याचे कबुल केले होते. आरोपीने सांगितले की, त्याने एकूण १८ मंदिरांमध्ये असं विकृत कृत्य केलं आहे. मात्र यापैकी केवळ पाच पाच मंदिरांकडून पोलिसांना तक्रारी मिळाल्या होत्या.

पोलिसांनी दिलेल्या माहितीनुसार, आरोपीने जबाबामध्ये सांगितले की, मंदिरांमध्ये तो यासाठी कंडोम फेकायचा जेणेकरून ती अपवित्र होऊन लोक आपल्या धर्माकडे आकृष्ट व्हावेत, हा त्याचा हेतू होता. केवळ मंदिरच नाही तर मशिदी आणि गुरुद्वारामध्येही त्याने अशाप्रकारे कंडोम फेकले होते. दरम्यान, केलेल्या कृत्याचा आरोपीला कुठलाही पश्चाताप नाही आहे. त्याने सांगितले की, तो केवळ येशूच्या शिकवणीचा प्रसार करत होता. आरोपीने सांगितले की, बायबल सांगते की येशूशिवाय अन्य कुणीही ईश्वर नाही आहे. तसेच अशुद्ध वस्तू ह्या अपवित्र ठिकाणीच टाकाव्यात म्हणून मी कंडोम मंदिरांमध्ये फेकत असे, असेही त्याने सांगितले.