लोकलमधून थुंकणं जिवावर बेतलं, मुंब्य्राच्या दोन तरुणांचा मृत्यू

सरफराज समीर खान (वय - १७), अमन सय्यद (वय - १९) यांचा मृत्यू

मुंबई - छत्रपती शिवाजी महाराज टर्मिनसला जाणाऱ्या जलद लोकलमधून थुंकण्यासाठी बाहेर डोकावताना तोल गेल्यामुळे रुळावर पडून 17 वर्षीय तरुणाचा मृत्यू झाला. तसेच त्याच्यासोबत प्रवास करत असलेला त्याचा मित्र १९ वर्षीय अमन सय्यद हा देखील गंभीर जखमी झाला होता. त्याचा देखील उपचारादरम्यान मृत्यू झाला असल्याची माहिती छत्रपती शिवाजी महाराज टर्मिनस रेल्वे पोलीस ठाण्याचे वरिष्ठ पोलीस निरीक्षक हेमंत बावदनकर यांनी दिली. 

सरफराज समीर खान (वय - १७), अमन सय्यद (वय - १९) आणि अजून एक मित्र काल मुंब्र्याहून दक्षिण मुंबईतील एका दर्ग्यात दर्शनासाठी आले होते. मुंब्याहून त्यांनी स्लो लोकल पकडली होती. नंतर घाटकोपर रेल्वे स्थानकावर उतरून त्यांनी  छत्रपती शिवाजी महाराज टर्मिनसला येणारी जलद लोकल पकडली होती. प्रवासादरम्यान रात्री साडेनऊच्या सुमारास सॅण्डहर्स्ट रोड रेल्वे स्थानकादरम्यान सरफराज थुंकण्यास झुकला आणि त्याचा हात सुटून तोल गेला. त्याच्यासोबत लोकलच्या दरवाज्यात उभा असलेला मित्र अमन देखील गंभीर जखमी झाला होता. सरफराज जागीच ठार झाला होता. तर उपचारासाठी सेंट जॉर्ज रुग्णालयात दाखल केले असता डॉक्टरांनी त्याला मृत घोषित केले. यांच्यासोबत अजून एक मित्र प्रवास करत होता. तो मात्र वाचला आणि त्यानेच घडलेला सर्व प्रकार पोलिसांना सांगितला. दोघांचेही पालक शोकाकुल झाले होते असल्याची माहिती  हेमंत बावदनकर  यांनी दिली.