लग्नाचं वेड अन् जीवाशी खेळ! प्रेयसी प्यायली टॉयलेट क्लिनर तर प्रियकर चढला विजेच्या टॉवरवर 

प्रेयसीसोबत लग्न करण्याची मागणी करत वीरुगिरी करण्यासाठी सकाळी 10 वाजण्याच्या सुमारास हनुमान खेजाडी मंदिराजवळील टॉवरवर एक तरुण चढला.

प्रेमात लोकं वाटेल ते करतात. अजब प्रेमाचे गजब किस्सेही अनेकदा समोर येत असतात. अशीच एक घटना आता समोर आली आहे. लग्नासाठी प्रियकर-प्रेयसीने टोकाचं पाऊल उचललं आहे. धक्कादायक बाब म्हणजे प्रियकर आधीच विवाहित असून प्रेयसी अल्पवयीन आहे. मात्र त्यांना लग्न करायची इतकी घाई झाली की, ते यासाठी जीव द्यायलाही तयार झाले. लग्नाच्या हट्टामुळे अल्पवयीन प्रेयसीने टॉयलेट क्लिनर पिऊन आत्महत्येचा प्रयत्न केला. त्याचवेळी तिच्या प्रेमात वेडा झालेला विवाहित तरुण विजेच्या टॉवरवर चढला.

मिळालेल्या माहितीनुसार, श्रीगंगानगर जिल्ह्यातील सुरतगडमध्ये ही घटना घडली. प्रेयसीसोबत लग्न करण्याची मागणी करत वीरुगिरी करण्यासाठी सकाळी 10 वाजण्याच्या सुमारास हनुमान खेजाडी मंदिराजवळील टॉवरवर एक तरुण चढला. अल्ताफ असे या तरुणाचे नाव सांगितले जात आहे. तो सुरतगडच्या वॉर्ड क्रमांक 6 चा रहिवासी आहे. अल्ताफ टॉवरवर चढल्यानंतर तेथे लोक जमा झाले. या घटनेची माहिती शहर पोलीस ठाण्यात देण्यात आल्यानंतर पोलीस घटनास्थळी हजर झाले.

पोलिसांनी तरुणाची समजूत घालून अग्निशमन दल आणि रुग्णवाहिका बोलावली. याच दरम्यान तरुणाचा मित्र टॉवरवर चढला आणि त्याने तरुणाला त्याच्या प्रेयसीसोबत व्हिडिओ कॉलद्वारे बोलायला लावलं. यावेळी प्रेयसीने केलेल्या आवाहनावर तरुण भावूक झाला. नंतर तो टॉवरवरून खाली आला. त्यानंतर पोलिसांनी आणि तरुणाच्या कुटुंबीयांनी सुटकेचा नि:श्वास सोडला. त्यानंतर शहर पोलिसांनी तरुणाला ताब्यात घेतले. यावेळी उपस्थित लोकांनी संपूर्ण घटनेचा व्हिडिओ बनवला आणि नंतर तो सोशल मीडियावर व्हायरलही केला.

या घटनेच्या एक दिवस आधी तरुणाच्या प्रेयसीही प्रियकराशी लग्न करण्याची मागणी करत टॉयलेट क्लीनर प्यायली होती. ही माहिती मिळताच तिचे कुटुंबीय घाबरले. त्यांनी तातडीने मुलीला रुग्णालयात दाखल केले. सध्या पोलीस या तरुणाची चौकशी करत आहेत. त्याचवेळी प्रेयसीचे नातेवाईकही मुलीला समजावण्याचा प्रयत्न करत आहेत. सध्या या घटनेची जोरदार चर्चा रंगली आहे. एका हिंदी वेबसाईटने याबाबतचे वृत्त दिले आहे.