रागाच्या भरात बॉयफ्रेंडनं केली गर्लफ्रेंडची हत्या; ७ महिने मृतदेह घरातच लपवला अन् शेवटी...

काही महिन्यानंतर मॅथ्यूच्या शेजाऱ्यांना त्याच्या घरातून घाणेरडा वास येत असल्याचं आढळलं.

कपलमध्ये अनेकदा कुठल्या ना कुठल्या कारणावरुन वादविवाद होत असतात. परंतु प्रकरण तेव्हा गंभीर बनतं जेव्हा या भांडणांचं रुपांतर धोकादायक गुन्ह्यात घडतं. अमेरिकेत सध्या असेच एक प्रकरण समोर आलं आहे. ज्याठिकाणी एका व्यक्तीवर आरोप आहे की, त्याने त्याच्या गर्लफ्रेंडचा खून करत तिचा मृतदेह ७ महिने घरातच ठेवला होता. या प्रकरणाचा खुलासाही मोठ्या शिताफीनं करण्यात आला.

अमेरिकेतील मिशिगन येथील हा प्रकार आहे. न्यूजवीक एका रिपोर्टनुसार, मॅथ्यू नावाचा युवक असून त्याच्या गर्लफ्रेंडचं नाव विंटर्स आहे. हे दोघंही रिलेशनशिपमध्ये होते आणि अचानक दोघांमध्ये कुठल्यातरी कारणावरून भांडणं झालं. हे भांडण इतकं टोकाला गेले की दोघंही वेगवेगळे राहू लागले. यावेळी मॅथ्यू खूप भडकला होता. विंटर्सला धडा शिकवावाच लागेल असं मॅथ्यूनं निश्चित केले.

काही महिन्यानंतर मॅथ्यूच्या शेजाऱ्यांना त्याच्या घरातून घाणेरडा वास येत असल्याचं आढळलं. तेव्हा त्यांना काहीतरी गडबड जाणवली. त्यांनी तात्काळ पोलिसांना फोन केला आणि ही माहिती दिली. पोलीस जेव्हा घटनास्थळी पोहचले तेव्हा त्यांनी जे दृश्य पाहिले त्यामुळे हैराण झाले. पोलिसांनी मॅथ्यूला अटक केली. अखेर पोलिसांच्या चौकशीत मॅथ्यूनं विंटर्संची हत्या केल्याचं कबूल केले. मॅथ्यूने डिसेंबर २०२० मध्ये गर्लफ्रेंडसोबत भांडण झाल्यानंतर तिची हत्या केली होती.

पोलिसांना दिलेल्या कबुलीजबाबनुसार, मागील नोव्हेंबर महिन्यात विंटर्सने मॅथ्यूपासून वेगळं राहण्याचा निर्णय घेतला. त्यानंतर एकेदिवशी विंटर्स अचानक मॅथ्यूच्या घरी पोहचली. त्याठिकाणी मॅथ्यूने तिचा खून केला आणि तिचा मृतदेह घराच्या बेसमेंटमध्ये लपवून ठेवला. सात महिन्यानंतर परिसरात दुर्गंधी पसरली तेव्हा या घटनेचा खुलासा झाला.