लातुरात डिएडच्या विद्यार्थ्यांची टेरेसवरुन उडी घेऊन आत्महत्या

मोबाईल ताब्यात, समांतर मार्गावरील घटना

लातूर: शहरातील एक नंबर (एमआयडीसी) येथे असलेल्या सावंत अपार्टमेंटच्या टेरेसवरून उडी मारून एका १९ वर्षीय डिएडच्या विध्यार्थ्यांने आत्महत्या केल्याची घटना गुरुवारी सकाळी दहा वाजण्याच्या सुमारास घडली. याबाबत एमआयडीसी पोलीस ठाण्यात अकस्मात मृत्यूची सायंकाळी नोंद करण्यात आली आहे. अविनाश व्यंकटराव सानप असे मयत विद्यार्थ्यांचे नाव आहे.

पोलिसांनी सांगितले, एमआयडीसी पोलीस ठाण्यासमोर असलेल्या समांतर मार्गलगतच्या सावंत अपार्टमेंटमध्ये अविनाश आपल्या आई-वडील आणि बहिणीसोबत वास्तव्याला होता. सध्याला तो डिएडच्या प्रथम वर्षात शिक्षण घेत होता. त्याचे आई-वडील हे शिक्षक असल्याची प्राथमिक माहिती समोर आली आहे. ते सकाळी ९ वाजण्याच्या सुमारास घराबाहेर पडले. त्यापाठोपाठ बहिणही शिक्षणासाठी घराबाहेर पडली. दरम्यान, अविनाश हा घरात एकटाच होता. गुरुवारी सकाळी १० वाजण्याच्या सुमारास अविनाश सानप याने अपार्टमेंटच्या टेरेसवर गेला आणि तेथून उडी मारली. यामध्ये त्याचा मृत्यू झाला. सानप कुटुंब हे निलंगा तालुक्यातील नदी हत्तरगा येथील असल्याची माहिती पोलीस निरीक्षक संजीवन मिरकले यांनी दिली. अविनाश सानप याने आत्महत्या का केली याचे कारण मात्र समजू शकले नाही. मात्र, अविनाशचा मोबाईल पोलिसांनी ताब्यात घेतला आहे. 

याबाबत एमआयडीसी पोलीस ठाण्यात दिलेल्या माहितीनुसार अकस्मात मृत्यूची नोंद करण्यात आली आहे.