खळबळजनक! शाळकरी मुलीची आत्महत्या; अनेक दिवसांपासून होती मानसिक तणावात 

Suicide Case : तिच्या तणावाचे नेमके कारण समोर आलेले नसल्याने रबाळे एमआयडीसी पोलीस याप्रकरणी अधिक तपास करत आहेत. 

नवी मुंबई : महानगर पालिकेच्या शाळेत पाचवीत शिकणाऱ्या मुलीने राहत्या घरात गळफास घेऊन आत्महत्या केल्याची घटना बुधवारी रात्री घडली आहे. अनेक दिवसांपासून ती मानसिक तणावात होती. परंतु तिच्या तणावाचे नेमके कारण समोर आलेले नसल्याने रबाळे एमआयडीसी पोलीस याप्रकरणी अधिक तपास करत आहेत. 

रबाळे एमआयडीसी मधील संभाजी नगर परिसरात हा प्रकार घडला आहे. आरती सोनार (११) असे आत्महत्या केलेल्या मुलीचे नाव असून ती महापालिकेच्या शाळेत पाचवीत शिकत होती. बुधवारी रात्री ८ च्या सुमारास तिची आई कामावरून घरी आली असता हा प्रकार उघड झाला. आई वडील कामाला व मोठी बहीण घराबाहेर गेली असताना हा प्रकार घडला आहे. ओढणीने गळफास लावलेल्या अवस्थेत तिचा मृतदेह आढळून आल्यानंतर पोलिसांनी तो ताब्यात घेऊन शव विच्छेदनानंतर नातेवाईकांच्या ताब्यात दिला आहे. दरम्यान ती शाळेत जात नसल्याने आई तिला ओरडली होती. त्यातून हा प्रकार घडला असल्याची शक्यता रबाळे एमआयडीसी पोलिसांनी वर्तवली आहे. दरम्यान यामागे इतरही काही कारण आहे का याचाही अधिक तपास पोलीस करत आहेत.