Crime News: नातवानेच केला आजीचा खून, हातातील कड्याच्या सहाय्याने वार

हरसूल शहरातील इंदिरा नगर येथे मंगळवार (दि.२३) रोजी सकाळी ६ वाजेच्या सुमारास ही घटना घडली असल्याचे समजले

औरंगाबाद/हरसूल : लहानपणी जन्मदात्या आईपेक्षा आजीलाच नातवांची खूप काळजी आणि जबाबदारी सांभाळावी लागते. परंतु, रक्ताच्याच नात्याला हल्ली काळिमा फासली जात आहे. हरसूलमध्ये नातवानेच सांभाळ करणाऱ्या आजीच्याच कुरवळणाऱ्या कुशीवर घाव घातल्याने आजीचा दुर्दैवी मृत्यू झाला. गंगुबाई रामा गुरव असे मृत आजीचे नाव असून या घटनेमुळे हरसूल परिसरात हळहळ व्यक्त होत आहे.

हरसूल पोलीस स्टेशनचे उपनिरीक्षक जनार्धन झिरवाळ यांनी दिलेल्या माहितीनुसार, हरसूल शहरातील इंदिरा नगर येथे मंगळवार (दि.२३) रोजी सकाळी ६ वाजेच्या सुमारास ही घटना घडली असल्याचे समजले. कुटुंबातील गंगुबाई रामा गुरव (वय ७०) या आजीबाईच्या उजव्या डोळ्याजवळ नातू दशरथ गुरव (वय २२) याने हातात घातलेल्या कड्याच्या सहाय्याने वार केले आहेत. त्यात तिचा जागीच मृत्यू झाला. मृतदेह हरसूल ग्रामीण रुग्णालयात शवविच्छेदन करण्यासाठी दाखल करण्यात आला आहे. याप्रकरणी, दुपारपर्यंत हरसूल पोलीस स्टेशनला गुन्हा दाखल करण्याचे काम चालू होते. 

दरम्यान, नातवानेचे आपल्या आजीचा जीव घेतल्याने परिसरात हळहळ व्यक्त होत आहे. उपविभागीय पोलीस अधिकारी कविता फडतरे यांच्या मार्गदर्शनाखाली हरसूल पोलीस स्टेशनचे सहाय्यक पोलीस निरीक्षक गणेश वारुळे यांच्या नेतृत्वाखाली उपनिरीक्षक जनार्धन झिरवाळ,पोलीस कर्मचारी एस. सी.जाधव,पी.एम.जाधव अधिक तपास करीत आहे. या अगोदरही हरसूल भागात अशीच घटना घडली होती.