लातुरात दिवसाढवळ्या कोयत्याने सपासप वार करून विद्यार्थ्यांचा खून; बारावीत होता मुलगा

हल्लेखोरांचा पोलीस शोध घेत आहेत.

लातूर : शहरातील विशाल नगर भागातील श्री साई मंदिर लगत भर रस्त्यावर इयत्ता बारावीत शिकणाऱ्या विद्यार्थ्यांवर कोयत्याने सपासप वार करण्यात आल्याची घटना रविवारी दुपारी बारा वाजण्याच्या सुमारास घडली. यामध्ये गंभीर जखमी झालेल्या मुलाचा शासकीय रुग्णालयात मृत्यू झाला, अशी माहिती पोलिसांनी दिली आहे. घटनास्थळी पोलिसांनी भेट देऊन पंचनामा केला आहे.

या घटनेने लातुरात एकच खळबळ उडाली आहे. मयत मुलाचे नाव राहुल सुरेश उजळंंबे (१९, रा. मोती नगर, लातूर) असे आहे. हल्लेखोरांचा पोलीस शोध घेत असून, एकाला ताब्यात घेतले आहे. याबाबत एमआयडीसी पोलीस ठाण्यात खुनाचा गुन्हा दाखल करण्याची प्रक्रिया सुरु आहे. हा खून कोणत्या कारणासाठी घडला, याचाही पोलीस तपास करीत आहेत, असे लातूर शहराचे उपविभागीय पोलीस अधिकारी जितेंद्र जगदाळे यांनी सांगितले.