चोरट्याला विरोध करणाऱ्यावर वार

नववर्षाच्या पहिल्या मध्यरात्री साडेबाराच्या सुमारास फिर्यादी राहत असलेल्या पुंडलिक चाळीतील शिनू टेलर यांच्या घरात घुसण्याचा प्रयत्न चोरट्याने केला,

लोकमत न्यूज नेटवर्क
भिवंडी : चोरीच्या उद्देशाने एकाच्या घरात घुसण्याचा प्रयत्न करणाऱ्या चोरट्याला अडविल्याने त्याने एका नागरिकावर ब्लेडने वार करून गंभीर जखमी केल्याची घटना भिवंडीतील पद्मानगर येथे रात्री साडेबारा वाजता घडली. तसेच त्याला अडवायला आलेल्या दोघा मुलींसह एकाला धमकवण्याचाही चोरट्याने प्रयत्न केला; परंतु त्या चोरट्यास नागरिकांनी पकडून पोलिसांच्या ताब्यात दिले आहे. शाहरुख अबरार खान (२०, रा. समदनगर) असे अटक आरोपीचे नाव आहे.

नववर्षाच्या पहिल्या मध्यरात्री साडेबाराच्या सुमारास फिर्यादी राहत असलेल्या पुंडलिक चाळीतील शिनू टेलर यांच्या घरात घुसण्याचा आरोपी शाहरुख घुसण्याचा प्रयत्न करीत होता. आरोपीस सुरेश लक्ष्मण भोया (३५) यांनी अडवले व जाब विचारला असता त्याने आपल्या जवळील धारदार ब्लेडने सुरेश यांच्या छातीपासून पोटापर्यंत वार करून गंभीर जखमी केले. यावेळी जखमीच्या मदतीकरिता आलेल्या शिनू टेलरच्या मुली कल्याणी, बागवानी व इतर लोकांना धारदार ब्लेड दाखवत धमकावले. यानंतर मात्र नागरिकांनी आरोपीस पकडून पोलिसांच्या हवाली करीत त्याच्या विरोधात तक्रार दिली. पोलिसांनी गुन्हा दाखल करून आरोपी शाहरुख यास अटक केली आहे. या गुन्ह्याचा अधिक तपास पोलीस उपनिरीक्षक एस. एल. भापकर करीत आहेत.