गस्त घालणाऱ्या पोलिसांशी हुज्जत, गुन्हा दाखल करुन तिघांना अटक

संशयितांशी झालेल्या झटापटीत दोन पोलिस कर्मचारी जखमी

अतुल जोशी

धुळे: शहरातील शब्बीरनगर भागात रात्रीची गस्त घालणाऱ्या पोलिस वाहनाला अडवून पोलिसांशी हुज्जत घालत त्यांच्याशी झटापट करून शासकीय कामात अडथळा आणला. आरोपींशी झालेल्या झटापटीत दोन पोलिस कर्मचारी जखमी झाल्याची घटना शब्बीरनगर भागात सोमवारी रात्री ११ वाजेच्या सुमारास घडली. याप्रकरणी चाळीसगावरोड पोलिसात गुन्हा दाखल करून तिघांना अटक करण्यात आली आहे.

सोमवारी रात्री चाळीसगाव रोड पोलिस स्टेशनचे कर्मचारी शब्बीर नगरभागात गस्त घालत होते. त्यावेळी वसीम उर्फ वड्या सलीम रंगरेज (वय ४२, रा.शब्बीरनगर), इमरान उर्फ बाचक्या शेख खालीद (वय २५, रा. अंबिकानगर) व अन्य एकाने पोलिसांचे वाहन अडवून त्यांच्याशी हुज्जत घातली. यावेळी संशयितांशी झालेल्या झटापटीत पोलिस शिपाई इंद्रजित इश्वर वैराट व पोलिस शिपाई स्वप्निल बबनराव सोनवणे हे दोघे जखमी झाले.

याप्रकरणी इंद्रजित वैराट यांनी चाळीसगाव रोड पोलिस स्टेशनला दिलेल्या फिर्यादीवरून वसीम रंगरेज, इमरान शेख खालीद व अन्य एकजण अशा तिघांनी शासकीय कामात अडथळा आणून दहशत निर्माण केल्याप्रकरणी तिघांविरूद्ध चाळीसगाव रोड पोलिस स्टेशनला गुन्हा दाखल करण्यात आला आहे. तिघांना अटक करण्यात आली आहे. तपास पोलिस उपनिरीक्षक व्ही.टी.पवार करीत आहे.