ठाण्यातील अल्पवयीन मुलीवर सामुहिक बलात्कार करणाऱ्या तिघांना अटक

ठाणे गुन्हे अन्वेषण विभागाची कारवाई

लोकमत न्यूज नेटवर्क, ठाणे: ठाण्यातील एका खासगी क्लासच्या दहावीतील विद्यार्थीनीवर भिवंडीतील काल्हेर भागात सामूहिक बलात्कार केल्याची संतापजनक घटना शुक्रवारी घडली. तिला मारहाण करीत, चावा घेत तिच्यावर लैंगिक अत्याचार करणाऱ्या सचिन कांबळे (३०), आकाश कनोजिया (२२) आणि आशिष उर्फ आशु मिश्रा (२२) या तिघांनाही गुन्हे अन्वेषण विभागाच्या वागळे इस्टेट युनिटने रविवारी पहाटेच्या सुमारास ताब्यात घेतले.

सूत्रांनी दिलेल्या माहितीनुसार, हे तिन्ही आरोपी छोटे मोठे इव्हेंट करतात. इंन्स्टाग्रामवर त्यांची पिडीत अल्पवयीन मुलीशी एक वर्षांपूर्वी ओळख झाली होती. याच ओळखीचा फायदा घेत कनोजिया तिला २६ ऑगस्ट २०२२ रोजी दुपारी तिच्या खासगी क्लासच्या ठिकाणी घेण्यासाठी आला. तिथून तो तिला घेऊन काल्हेर येथील दुर्गेश पार्क सोसायटीतील एका इमारतीमधील रुमवर घेऊन गेला. तिथे दुपारी २ ते सायंकाळी ४ या दोन तासांच्या दरम्यान सचिन, आकाश आणि आशिष उर्फ आशु या तिघांनीही तिच्यावर लैैंगिक अत्याचार केले. तिने विरोध केला असता, सचिन याने तिच्या पायांवर मारहाण केली. आकाशने तिला त्रास दिला. तर आशुनेही मारहाण करीत या प्रकाराची कोणालाही वाच्यता न करण्याची तिला धमकी दिली.

त्यानंतर काल्हेरमधून तिला ठाण्यातील घरी आणून साेडण्यात आले. या प्रकारामुळे तिला त्रास होऊ लागल्यानंतर तिने २७ ऑगस्ट रोजी रात्री याप्रकरणी चितळसर पोलीस ठाण्यात तक्रार दाखल केली. याबाबत बलात्कारासह बालकांचे लैंगिक अत्याचारापासून संरक्षण अधिनियम २०१२ नुसार २८ ऑगस्ट रोजी सकाळी ७.३० वाजण्याच्या सुमारास गुन्हा दाखल झाला. हाच गुन्हा नंतर नारपोली पोलीस ठाण्यात शून्य क्रमांकाने वर्ग केला आहे.

दरम्यान, शनिवारी पिडित मुलगी तक्रार देण्यासाठी चितळसर पोलीस ठाण्यात आली, त्याच वेळी पोलीस उपायुकत डॉ. विनय राठोड तसेच चितळसरच्या पोलीस निरीक्षक सुलभा पाटील आदींच्या पथकाने घटनास्थळी भेट दिली. दरम्यान, गुन्हे अन्वेषण विभागाच्या वागळे इस्टेट युनिटचे वरिष्ठ पोलीस निरीक्षक विकास घोडके यांच्या पथकाने रविवारी (२८ ऑगस्ट) पहाटेच्या सुमारास हाजूरीतून सचिन आणि आशिषला तर आकाशला काल्हेर भागातून अटक केली. तिघांनाही आता पोलिसांच्या ताब्यात देण्यात आले असून पिडित तरुणीवर एका शासकीय रुग्णालयात उपचार करण्यात येत असल्याची माहिती पोलिसांनी दिली.