केडगाव येथे तीन गतिमंद मुलींवर अत्याचार

केडगाव : दौंड तालुक्यातील केडगाव येथील पंडिता रमाबाई मुक्ती मिशन येथे कंत्राटी पद्धतीने काम करणाऱ्या एका मजुराने तीन गतिमंद मुलींवर लैंगिक अत्याचार केल्याची घटना नुकतीच घडली आहे. मुलींच्या असाहाय्यतेचा फायदा घेऊन नराधमाने बलात्कार केल्याचे समजते. याप्रकरणी यवत पोलिसांत गुन्हा दाखल करण्यात आला आहे. मोझेस सुभाष झोरे (वय ३५, रा. केडगाव ता. दौंड), असे अटक करण्यात आलेल्या नराधमाचे नाव आहे. या घटनेमुळे केडगाव परिसरात एकच खळबळ उडाली आहे.

मिशनमधील संपूर्ण महाराष्ट्रातून आलेल्या अनाथ मुलींच्या सुरक्षिततेबाबत प्रश्नचिन्ह निर्माण झाले आहे. शनिवारी (दि. ८) सकाळच्या सुमारास यवत पोलिसांनी चौकशीसाठी पंडिता रमाबाई मुक्ती मिशनमध्ये प्रवेश केला. यावेळी मिशनला लष्करी छावणीचे स्वरूप आले होते. बाहेरील व्यक्तीला या मिशनमध्ये प्रवेश घेण्यासाठी वेगवेगळ्या परवानग्या घ्याव्या लागतात; परंतु आतमध्ये कंत्राटी काम करणाऱ्या व्यक्तीने वरील गुन्हा केल्याने संशयाचे वातावरण तयार झाले आहे. याप्रकरणी अधिक तपास दौंडचे उपविभागीय पोलिस अधिकारी स्वप्नील जाधव करीत आहेत.