प्रेमप्रकरणातून रक्तरंजित संघर्ष! ३ महिलांसह पाच जणांची हत्या; लहान मुलांना ठेवलं ओलीस

प्रेमप्रकरणावरून हिंसक हाणामारी झाली, ज्यात तीन महिलांसह पाच जणांचा मृत्यू झाला, तर चार जण जखमी झाले.

ओडिशातील सुंदरगड जिल्ह्यात मंगळवारी रात्री एक धक्कादायक घटना समोर आली आहे. येथे प्रेमप्रकरणावरून हिंसक हाणामारी झाली, ज्यात तीन महिलांसह पाच जणांचा मृत्यू झाला, तर चार जण जखमी झाले. घटनेची माहिती मिळताच परिसरात घबराट पसरली. या घटनेची माहिती मिळताच पोलीस घटनास्थळी दाखल झाले आणि त्यांनी पाहणी केली. पोलिसांनी मृतदेह ताब्यात घेऊन तपास सुरू केला आहे.

मिळालेल्या माहितीनुसार, सुंदरगड सदर पोलीस स्टेशन परिसरात ही घटना घडली आहे. या घटनेमागे प्रेमप्रकरण होतं. अविनाश पवार नावाच्या व्यक्तीचा स्थानिक लोकांशी वाद झाल्याचं प्रत्यक्षदर्शी सांगतात. पवार याने दोन लग्न केली होती आणि त्याला मुलंही आहेत. अविनाशच्या प्रेमप्रकरणामुळे स्थानिक लोकांशी असलेला वाद इतका वाढला की, हाणामारी झाली.

रात्री अकराच्या सुमारास लोक झोपले असताना चाकूधारी हल्लेखोरांनी त्यांच्यावर अचानक हल्ला केला. या हल्ल्यात पाच जणांचा मृत्यू झाला, तर अविनाश आणि अन्य एक महिला जखमी झाली. यानंतर हल्लेखोरांनी घटनास्थळावरून पळ काढला आणि अविनाशची दुसरी पत्नी आणि दोन मुलांना ओलीस ठेवलं. घटनेनंतर घटनास्थळी राडा झाला. या प्रकरणाची माहिती तात्काळ पोलिसांना देण्यात आली. 

दोन गटांमध्ये मोठ्या प्रमाणात हाणामारी झाल्याची माहिती मिळाल्यानंतर पोलिसांनी घटनास्थळ गाठलं. घटनास्थळी तीन महिला आणि दोन पुरुष मृतावस्थेत आढळून आले. या घटनेत जखमी झालेल्या लोकांना रुग्णालयात दाखल करण्यात आले आहे. घटनास्थळी श्वानपथक आणि फॉरेन्सिक टीम तैनात करण्यात आली आहे.