विहिरीत पडून दोन मुलींचा मृत्यू; वाड्यातील नेहरोली येथील घटना

Drowning Case : रात्री आठ वाजण्याच्या सुमारास या दोन्ही मुलींचे मृतदेह विहिरीतून बाहेर काढून वाडा ग्रामीण रुग्णालयात नेले असता त्यांना वैद्यकीय अधिकाऱ्यांनी मृत घोषित केले.

ठळक मुद्देनैना वाघ (२३) आणि राणी जाधव (८) अशी या दुर्दैवी मुलींची नावे आहेत.

वाडा : तालुक्यातील नेहरोली येथील दोन मुलींचा गावातील पडक्या विहिरीत पडूून बुडून मृत्यू झाल्याची घटना रविवारी सायंकाळच्या सुमारास घडली आहे. या घटनेने हळहळ व्यक्त होत आहे.

नैना वाघ (२३) आणि राणी जाधव (८) अशी या दुर्दैवी मुलींची नावे आहेत. मिळालेल्या माहितीनुसार, नेहरोली गावातील या दोघी मुली रविवारी संध्याकाळी कपडे धुण्यासाठी विहिरीवर गेल्या होत्या. त्या रात्र झाली तरी घरी परत न आल्याने त्यांच्या घरातील माणसांनी त्यांची शोधाशोध सुरू केली. गावातील पडक्या विहिरीवर या मुलींनी धुण्यासाठी नेलेले काही कपडे पडलेले दिसल्याने या विहिरीतच मुली बुडाल्याचा नागरिकांना संशय आला. काही नागरिकांनी विहिरीत उडी मारून पाहिले असता या दोन्ही मुलींचे मृतदेह विहिरीत सापडले. रात्री आठ वाजण्याच्या सुमारास या दोन्ही मुलींचे मृतदेह विहिरीतून बाहेर काढून वाडा ग्रामीण रुग्णालयात नेले असता त्यांना वैद्यकीय अधिकाऱ्यांनी मृत घोषित केले. यातील नैना ही मूकबधिर व पायाने थोडी अपंग होती, तर राणी ही घरातील एकुलती एक मुलगी होती. अशा घटनेची पुनरावृत्ती होऊ नये म्हणून ग्रामपंचायत प्रशासनाने ही पडकी विहीर बांधून घ्यावी, अशी मागणी नेहरोली गावातील नागरिकांनी केली आहे.