दोन अजब मोटारसायकल चोरांना अटक; १० मोटार सायकल  आणि १ रिक्षा हस्तगत

त्यांच्याकडून तब्बल 10 मोटारसायकल आणि एक रिक्षा जप्त केल्या असून पोलीस अधिक चौकशी करीत आहेत.

उल्हासनगर - मोटारसायकल चोरून त्यातील पेट्रोल संपेपर्यंत चालविण्याची हौस करणाऱ्या दोन तरुणांना विठ्ठलवाडी पोलिसांनी अटक केली. त्यांच्याकडून तब्बल 10 मोटारसायकल आणि एक रिक्षा जप्त केल्या असून पोलीस अधिक चौकशी करीत आहेत.

उल्हासनगरात किमान दोन ते तीन मोटारसायकली चोरीच्या गुन्ह्याची नोंद विविध पोलीस ठाण्यात करण्यात आली आहे. विठ्ठलवाडी पोलीस ठाण्याच्या हद्दीतून चोरीला गेलेली मोटारसायकल आकाश गायकवाड याच्या ताब्यात असल्याची माहिती विठ्ठलवाडी पोलिसांना मिळाली. त्यांनी आकाश गायकवाड याला जेरबंद केल्यानंतर त्याने सर्व माहिती पोलिसांना दिली. रस्त्यावर मोटारसायकल दिसताच ती चोरून आपली हौस पूर्ण होईपर्यंत चालवून झाल्यानंतर बेवारस स्थितीतच मोटारसायकल सोडून द्यायची. यामध्ये त्याचा मित्र बिनसेन मोतीस सहभागी असल्याचे त्याने सांगितले. पोलिसांनी आकाश व बिनसेन मोतीस त्यांच्याकडून १० मोटारसायकली व १ रिक्षा हस्तगत केल्या आहे.

विठ्ठलवाडी पोलिसांनी त्यांच्याकडे अधिक चौकशी केली असता, बिनसेन हा मोटारसायकलचा शौकीन असून मोटारसायकल चालवण्याचा छंद होता. मोटारसायकलचा छंद पूर्ण करण्यासाठी त्याने आकाशच्या मदतीने चोरीचा सपाटा लावला. याप्रकरणी विठ्ठलवाडी पोलीस ठाण्यात दोघांवर गुन्हा दाखल झाला असून त्यांच्याकडून पोलिसांनी ५ लाख ४० हजार किमतीच्या १० मोटरसायकल १ रिक्षा जप्त केल्या आहेत.