उन्नाव बलात्कार प्रकरण : भाजपच्या निलंबित दोषी आमदाराच्या शिक्षेवर २० डिसेंबरला सुनावणी  

आता २० डिसेंबरला सेंगरला शिक्षा काय होणार ? यावर सुनावणी होणार आहे.    

ठळक मुद्देआज कोर्टाने सुनावणी पुढे ढकलली असून निवडणुकीसाठी उमेदवारी अर्ज दाखल करताना निवडणूक आयोगाकडे दाखल केलेल्या प्रतिज्ञापत्राची प्रत मागितली आहे. दोषी कुलदीपच्या वकिलांनी त्याचे सामाजिक आयुष्य पाहता कमीत कमी शिक्षा देण्याची कोर्टाला विनंती केली आहे.

नवी दिल्ली - २०१७ साली  उत्तर प्रदेशात उन्नाव येथे तरुणीचे अपहरण आणि सामूहिक बलात्कार केल्या प्रकरणी तीस हजारी कोर्टानं भाजपाचे निलंबित आमदार कुलदीप सिंह सेंगरला काल दोषी ठरवलं आहे. तर महिला सहकारी असलेल्या शशी सिंह यांची न्यायालयानं निर्दोष मुक्तता केली आहे. तीस हजारी कोर्टाचे न्यायाधीश धर्मेश शर्मा यांनी हा निर्णय दिला असून सीबीआयने कोर्टात कुलदीपला कठोरातील कठोर शिक्षा द्यावी अशी मागणी केली आहे. तर दोषी कुलदीपच्या वकिलांनी त्याचे सामाजिक आयुष्य पाहता कमीत कमी शिक्षा देण्याची कोर्टाला विनंती केली आहे. मात्र, आज कोर्टाने सुनावणी पुढे ढकलली असून निवडणुकीसाठी उमेदवारी अर्ज दाखल करताना निवडणूक आयोगाकडे दाखल केलेल्या प्रतिज्ञापत्राची प्रत मागितली आहे. आता २० डिसेंबरला सेंगरला शिक्षा काय होणार ? यावर सुनावणी होणार आहे.    

कोर्टाने १० डिसेंबरला सर्वच पक्षकारांचा युक्तिवाद ऐकल्यानंतर निर्णय १६ डिसेंबरपर्यंत राखून ठेवला होता. काल सुनावणीदरम्यान कोर्टाने सेंगरला दोषी ठरवलं. सर्वोच्च न्यायालयाच्या हस्तक्षेपानंतर हे प्रकरण लखनऊहून दिल्लीतील तीस हजारी कोर्टाकडे वर्ग करण्यात आलं होतं. न्या. धर्मेश शर्मा यांनी ५ ऑगस्टपासून या प्रकरणावर प्रत्येक दिवशी सुनावणी सुरू केली होती. कोर्टाने पॉक्सो कायदा, कलम ३ व ४ आणि भा. दं. वि. कलम १२०ब (गुन्हेगारी कट), ३६३ (अपहरण), ३६६ (अपहरण आणि महिलेवर विवाहासाठी दबाव टाकणं), ३७६ (बलात्कार) असे गुन्हे निश्चित करण्यात आले आहेत. ४ जून २०१७ रोजी नोकरी देण्याच्या बहाण्यानं सेंगरनं सहकारी शशी सिंह हिच्यासोबत मिळून कट रचला आणि १६ - १७ वर्षांच्या तरुणीशी जबरदस्तीनं शारीरिक संबंध प्रस्थापित केले.

2017 Unnao rape case: Delhi's Tis Hazari Court adjourns the arguments on quantum of punishment for 20th December and also seeks the copy of affidavit of Former BJP MLA Kuldeep Singh Sengar filed during 2017 in Election Commission. pic.twitter.com/kIPJfF8p76

— ANI (@ANI) December 17, 2019

नेमकं काय आहे उन्नाव प्रकरण?
पीडिता आणि तिच्या आईनं मुख्यमंत्री योगी आदित्यनाथ यांच्या निवासस्थानी जाऊन आत्मदहनाचा प्रयत्न केल्यानंतर हे प्रकरण उजेडात आलं. पीडितेच्या वडिलांविरोधात ३ एप्रिल २०१८ रोजी  शस्त्र अधिनियमांतर्गत गुन्हा दाखल करण्यात आला होता. त्यानंतर पोलिसांनी केलेल्या मारहाणीत पीडितेच्या वडिलांचा मृत्यू झाला होता. २८ जुलै रोजी काकांना भेटून परतताना रायबरेलीत पीडिता, तिची काकी, मावशी आणि वकिलांच्या कारला एका ट्रकनं धडक दिली. यात काकी आणि मावशीचा मृत्यू झाला होता. तर पीडितेचा वकीलही गंभीर जखमी झाले होते. सर्वोच्च न्यायालयाच्या आदेशानंतर लखनऊहून दिल्लीला आणून जखमींना एम्स रुग्णालयात दाखल करण्यात आलं होतं. जिथे बरेच दिवस त्यांच्यावर उपचार झाले. सध्या पीडिता कुटुंबीयासोबत दिल्ली राहत असून, उन्नावमध्ये परतण्यास तिनं नकार दिला आहे.