पती आवडत नसल्यानं प्रियकर, मित्राच्या मदतीनं घडवली हत्या; महिन्याभरापूर्वीच सुरू झालेला संसार संपवला

जुलैमध्ये विवाह, ऑगस्टमध्ये हत्या; प्रियकर आणि मित्राच्या मदतीनं पत्नीनं पतीला संपवलं

लखनऊ: लखनऊच्या मडियांवमध्ये पत्नीनं तिच्या प्रियकर आणि मित्राच्या मदतीनं स्वत:च्या पतीची हत्या घडवून आणली आहे. पत्नीनंच या हत्येचा कट रचला होता. विशेष म्हणजे अवघ्या महिन्याभरापूर्वीच दोघांचा विवाह झाला होता. मात्र पत्नीला पती आवडत नसल्यानं तिनं त्याच्या हत्येचं कारस्थान रचलं. पोलिसांनी या प्रकरणी तिघांना अटक केली आहे. हत्या प्रकरणात वापरण्यात आलेलं पिस्तुल आणि एसयूव्ही कारदेखील पोलिसांनी ताब्यात घेतली आहे.

नवविवाहिता, तिचा प्रियकर आणि मित्र हे तिघेही प्राथमिक विद्यालयात सहाय्यक शिक्षक आहेत. शनिवारी पोलिसांनी तिन्ही आरोपींना न्यायालयात हजर केलं. न्यायालयानं त्यांची रवानगी पोलीस कोठडीत केली. हरदोई राहणारा आशुतोष सिंह (२७ वर्षे) मडियावच्या ग्लोबल डायग्नॉस्टिक सेंटरमध्ये पीआरओ होता. तो मडियावमधल्या इंद्रपुरम सोसायटीत भाऊ राजेश, अनुपम आणि पुतण्या विकास सिंहसोबत वास्तव्यास होता.

२३ ऑगस्टला आशुतोष रात्री कामावरून परतला. मात्र कोणाचा तरी फोन आल्यानं तो घरातून पुन्हा निघाला. २४ ऑगस्टला मडियावमधल्या आयआयएम रोडजवळ आशुतोषचा मृतदेह आढळून आला. गोळी झाडून आशुतोषची हत्या झाल्याची बाब शवविच्छेदन अहवालातून समोर आली. आशुतोषच्या भावानं दिलेल्या तक्रारीवरून पोलिसांनी तपास सुरू केला.

पोलिसांनी आशुतोषच्या पत्नीचा सीडीआर तपासला. त्यानंतर पत्नी प्रीती, तिचा प्रियकर हेमेंद्र प्रताप यादव आणि मित्र सुनील सिंह यांना अटक करण्यात आली. हेमेंद्रकडे हत्येत वापरण्यात आलेलं पिस्तुल सापडलं. प्रीती संडिला येथील प्राथमिक शाळेत शिक्षिका आहे. तर हेमेंद्र, सुनील इटावातल्या प्राथमिक शाळेत शिक्षक आहेत. हेमेंद्र आणि प्रीती २०१५ ते २०२१ दरम्यान औरास येथील प्राथमिक शाळेत कार्यरत होता. तेव्हा दोघांमध्ये प्रेमसंबंध निर्माण झाले. फेब्रुवारी २०२१ मध्ये प्रीतीची संडिला येथे बदली झाली. जुलै २०२१ मध्ये प्रीतीचा विवाह कुटुंबीयांनी आशुतोषसोबत केला. 

प्रीती आणि हेमेंद्र काही दिवस एकमेकांसोबत बोलत नव्हते. प्रीतीला आशुतोष आवडत नव्हता. तिनं ही बाब सुनीलला सांगितली. सुनीलनं ही गोष्ट हेमेंद्रच्या कानावर घातली. त्यानंतर प्रीतीनं हेमेंद्रकडे बदलीचा आग्रह धरला. मात्र बदली होऊ शकली नाही. त्यामुळे प्रीतीनं हेमेंद्र आणि सुनीलच्या मदतीनं पतीच्या हत्येचा कट रचला.