भयंकर! पत्नी म्हणाली, "शेजाऱ्याने माझी साडी चोरली"; संतापलेल्या पतीने उचललं टोकाचं पाऊल

हरियाणातील गुरुग्राम जिल्ह्यातील नथुपूर गावात एक धक्कादायक घटना घडली आहे. पत्नीची साडी चोरल्याचा आरोप करत एका व्यक्तीने शेजाऱ्याची गोळ्या झाडून हत्या केली. पोलिसांनी बुधवारी ही माहिती दिली. स्थानिक पोलिसांनी सांगितलं की, आरोपी अजयची पत्नी रीना हिने तिच्या पतीला सांगितलं की त्यांचा शेजारी पिंटूने तिची साडी चोरली आहे. 30 वर्षीय पिंटू गुरुग्राममध्ये सुरक्षा रक्षक म्हणून काम करत होता.

पोलिसांनी दिलेल्या माहितीनुसार, रात्री आठच्या सुमारास पिंटू ड्युटीवरून परतला तेव्हा अजय त्याच्याशी बोलला, मात्र पिंटूने चोरीचा आरोप फेटाळून लावला, त्यानंतर दोघांमध्ये खूप वाद सुरू झाला. पोलिसांनी सांगितले की, पिंटू मूळचा बिहारचा आणि अजय (42) उत्तर प्रदेशचा आहे. नाथुपूर गावात एकाच घरात भाड्याने वेगळ्या खोलीत राहत होते.

पिंटूचा रूममेट आणि घटनेचा प्रत्यक्षदर्शी अशोक कुमार याने पोलिसांना सांगितले की, भांडणाच्या वेळी अजयने त्याच्या खोलीतून बंदूक काढून पिंटूच्या पोटात गोळी झाडली. अशोकने तक्रारीत म्हटले आहे की, 'आम्ही त्याची बंदूक हिसकावून त्याला रोखण्याचा प्रयत्न केला, मात्र त्याने पुन्हा बंदूक हिसकावून पिंटूवर गोळी झाडली. आम्ही पिंटूला जवळच्या रुग्णालयात नेले, तेथे उपचारादरम्यान त्याचा मृत्यू झाला.

अजयच्या विरोधात मंगळवारी रात्री डीएलएफ फेज-3 पोलीस ठाण्यात गुन्हा दाखल करण्यात आला असून त्याला ताब्यात घेण्यात आले आहे. एका वरिष्ठ पोलीस अधिकाऱ्याने आरोपी सुरक्षा रक्षकाने त्याच्या परवाना असलेल्या बंदुकीने दुसऱ्या सुरक्षा रक्षकावर गोळी झाडली. त्याची बंदूक जप्त करण्यात आली असून त्याची चौकशी सुरू आहे. त्याला लवकरच अटक करण्यात येईल असं सांगितलं. एका हिंदी वेबसाईटने याबाबतचे वृत्त दिले आहे.