"प्लीज आई-बाबांना समजव, हे पाऊल नाईलाजाने उचलतेय"; भावाला ऑडिओ मेसेज करून 'तिची' आत्महत्या

Crime News : विवाहितेने आत्महत्येपूर्वी आपल्या भावाला एक ऑडिओ मेसेज पाठवला होता. त्यामध्ये तिने आपल्या मनातील दु:ख सांगितलं आहे.

नवी दिल्ली - महिलांवरील अत्याचाराच्या अनेक घटना या सातत्याने समोर येत आहेत. अशीच एक नात्याला काळीमा फासणारी घटना घडली आहे. हुंड्यासाठी पतीकडून केला जाणारा छळ आणि मारहाण सहन न झाल्याने एका विवाहितेने आपलं जीवन संपवल्याची धक्कादायक घटना समोर आली आहे. विवाहितेने आत्महत्येपूर्वी आपल्या भावाला एक ऑडिओ मेसेज पाठवला होता. त्यामध्ये तिने आपल्या मनातील दु:ख सांगितलं आहे. तसेच आत्महत्या करण्याच्या निर्णयाबद्दल आपल्या आई-वडिलांची माफी मागितली आहे. धक्कादायक बाब म्हणजे महिलेने ऑडिओमध्ये आपल्या भावाला सासरच्या लोकांवर कोणतीही कारवाई करू नका असंही सांगितलं आहे. 

मिळालेल्या माहितीनुसार, उत्तर प्रदेशातील बिजनौरमध्ये जलनपूर येथे एका आठ महिन्यांच्या गर्भवती महिलेने गळफास घेऊन आत्महत्या केली आहे. हुंड्यासाठी होणाऱ्या छळाला कंटाळून महिलेने आत्महत्या केल्याचा गंभीर आरोप कुटुंबीयांनी केला आहे. विवाहितेने जीव देण्यापूर्वी तिच्या भावाला एक ऑडिओ मेसेज पाठवला होता. यामध्ये तिने आपली व्यथा मांडली. पूजाचे वडील ओमप्रकाश यांनी हुंड्यासाठी मुलीची हत्या केल्याची तक्रार पोलिसांकडे दिली. यानंतर पोलिसांनी पूजाच्या सासरच्या लोकांविरोधात गुन्हा दाखल केला आहे आणि या प्रकरणाचा अधिक तपास सुरू केला आहे. 

सासरी हुंड्याची मागणी केली जात असल्याचा आरोप

बिजनौर येथील रहिवासी असलेल्या ओमप्रकाश यांनी आपली मुलगी पूजाचे 10 महिन्यांपूर्वी जलीलपूरमधील संजीव याच्याशी लग्न लावले होते. ओमप्रकाश यांनी लेकीच्या लग्नात कारही दिली होती. लग्नाआधी ओमप्रकाश यांना सांगण्यात आले होते, की जावई संजीव रेल्वेमध्ये तिकीट पर्यवेक्षक आहे. पण लग्नानंतर तो बेरोजगार असल्याचे समजले. तेव्हापासून दोन्ही कुटुंबांमध्ये दुरावा निर्माण झाला होता. पूजाच्या लग्नानंतरही तिच्या सासरी हुंड्याची मागणी केली जात असल्याचा आरोप केला जात आहे. हुंड्यासाठी तिला सातत्याने त्रास दिला जात होता. त्यामुळे तिने आत्महत्येसारखे टोकाचे पाऊल उचलले. पूजाच्या माहेरच्यांनी ती 8 महिन्यांची गर्भवती असल्याचे सांगितले. 

भावाला ऑडिओ मेसेज करून 8 महिन्यांच्या गर्भवतीची आत्महत्या

पूजाच्या कुटुंबीयांनी दिलेल्या माहितीनुसार, 5 दिवसांपूर्वी हुंड्यावरील वादानंतर ते संजीवच्या घरी त्याच्याशी बोलण्यासाठीही आले होते. तेव्हाही दोन कुटुंबांमध्ये मोठा वाद झाला होता. पूजाने आपला भाऊ राजनला एक ऑडिओ मेसेज पाठवला होता. त्यामध्ये तिने "दादा, तुम्ही माझ्यासाठी खूप काही केले आहे. पण आज मी हे पाऊल नाईलाजाने उचलत आहे. तू आपल्या आई-बाबांना समजावून सांग. माझ्या सासरच्या घरातून कोणतीही वस्तू परत घेऊ नका, एक चमचाही नाही. जेव्हा तुमची बहीणच राहणार नाही, तेव्हा त्या घराशी कसा संबंध असेल?, माझ्या सासरच्यांवरही कोणतीही कारवाई करू नका. त्यांना क्षमा करा" असं म्हटलं आहे. एका हिंदी वेबसाईटने याबाबतचे वृत्त दिले आहे.