रुग्णालयात दाखल असलेल्या तरुणीवर बाथरुममध्ये बलात्कार; फार्मसीमध्ये काम करणाऱ्या कर्मचाऱ्याचं कृत्य

मेडिकल स्टोअरमध्ये काम करणाऱ्या एका नराधम कर्मचाऱ्यानं तरुणीवर रुग्णालयाच्या बाथरुममध्ये अत्याचार केले.

दिल्लीच्या एनसीआरजवळील अलीगढ जिल्ह्यात एका तरुणीवर बलात्कार झाल्याची घटना समोर आली आहे. पीडित तरुणी जवाहरलाल नेहरु मेडिकल कॉलेज आणि ट्रामा सेंटरमध्ये उपचा घेत होती. याच दरम्यान गुरुवारी रात्री उशीरा मेडिकल स्टोअरमध्ये काम करणाऱ्या एका नराधम कर्मचाऱ्यानं तरुणीवर रुग्णालयाच्या बाथरुममध्ये अत्याचार केले. दुसऱ्या दिवशी सकाळी संबंधित तरुणी तिच्या वॉर्डमध्ये नसल्याचं लक्षात आल्यानंतर तिचा शोध घेण्यात आला. तर ती बाथरुम बाहेर रडत बसल्याचं दिसून आलं. पीडित तरुणीकडून घटनेची माहिती घेण्यात आल्यानंतर तिनं घडलेला संपूर्ण प्रसंग कथन केला. 

पीडित तरुणीच्या तक्रारीनंतर पोलिसांनी यासंदर्भात गुन्हा दाखल करत संबंधित नराधमाला अटक केली आहे. गुरूवारी रात्री पीडित तरुणी (२२) आपल्या बेडवरुन गायब झाली होती. त्यानंतर रुग्णालयाचे मुख्य चिकित्सा अधिकाऱ्या रुग्णालयाच्या सुरक्षा कर्मचाऱ्यांना तिचा शोध घेण्यास सांगितलं. सुरक्षा रक्षक पीडित तरुणीचा शोध घेत असताना त्यांना रुग्णालयाच्या बाथरुममध्ये किंचाळण्याचा आवाज आला. काहीवेळानंतर तरुणी रुग्णालयाच्या पहिल्या मजल्यावरील बाथरुम रडत बाहेर आली. कर्मचाऱ्यांनी नराधमाला पकडून पोलिसांच्या ताब्यात दिलं. 

चौकशी दरम्यान समोर आलेल्या माहितीनुसार, नराधम रुग्णालयाच्या मेडिकल स्टोअरमध्ये काम करत होता. तो दरवेळी वेगवेगळ्या बहाण्यानं पीडित तरुणीला मदत करण्यासाठी वॉर्डमध्ये यायचा. तरुणी बाथरुममध्ये जात असल्याचं दिसल्यानंतर त्यानं परिस्थितीचा फायदा घेत तिच्यावर अत्याचार केले. धक्कादायक बाब म्हणजे पीडित तरुणी रुग्णालयात दाखल असल्याची माहिती तिच्या कुटुंबीयांना देखील नव्हती. तरुणी फरीदाबादची राहणारी असून तिला रेल्वे अपघातात जखमी झाल्यामुळे रेल्वे पोलिसांनी रुग्णालयात दाखल केलं होतं. तिच्या कुटुंबीयांची कोणतीही माहिती अद्याप मिळालेली नसल्यानं रुग्णालयाकडूनच तिच्यावर उपचार केले जात होते. 

Read in English